सत्तेचा गैरवापर करुन विरोधकांचा आवाज दाबला जातोय – शरद पवार

टिम लोकप्रवाह, वर्धा (सचिन ओली) दि. ०४ : अखेर झालेल्या घडामोडीत वर्धा लोकसभेसाठी महाविकास आघाडीचे उमेदवार म्हणून आर्वी विधानसभेचे माजी आमदार अमर काळे यांची वर्णी लागली. ते राष्ट्रवादी शरद पवार गटाकडून तुतारी या चिन्हावर वर्धा लोकसभेची निवडणुक लढणार आहे. याकरीता दि. ०२ एप्रिल रोजी नामांकन दाखल करणेकामी भव्य रॕली व सभेचे आयोजन करण्यात आले होते. याप्रसंगी प्रमुख नेत्यांची उपस्थिती होती. त्यामध्ये राष्ट्रवादीचे सर्वेसर्वा शरद पवार, माजी गृहमंत्री अनिल देशमुख, माजी मंत्री आमदार रणजीत कांबळे, विरेंद्र जगताप, सुरेश देशमुख, हर्षवर्धन देशमुख, माजी नगराध्यक्ष शेखर शेंडे, अॕड. चारुलता टोकस, काँग्रेसचे जिल्हाध्यक्ष मनोज चांदुरकर, राष्ट्रवादीचे जिल्हाध्यक्ष सुनिल राऊत, शिवसेना उबाठा गट जिल्हाध्यक्ष श्रीकांत मिरापूरकर, आप चे जिल्हाध्यक्ष श्रीकांत दोड आदिंसह इतर महाविकास आघाडी व इंडिया अलायंसच्या इतर पदाधिकार्यांचा समावेश होता. यावेळी तब्बल १५ ते २० हजाराचा जनसमुदायाची उपस्थिती होती.

 देशात सध्या अघोषित आणीबाणी दिसून येत असून सत्तेचा गैरवापर होत आहे, अशी जळजळीत टीका शरद पवार यांनी दि. २ रोजी वर्धा येथे सरकारवर केली. वर्धा येथील अनेकांत स्वाध्याय मंदिर येथे महाविकास आघाडीचे उमेदवार अमर काळे यांचा नामांकन अर्ज दाखल करण्याच्या अनुषंगाने आयोजीत रॅलीपूर्वी आयोजित सभेत ते बोलत होते.

आपली लढाई धनशक्ती विरुद्ध जनशक्ती अशी होणार आहे. आपल्याकडे पैसा नाही पण लोक ही आपली ताकद आहे. हुकूमशाही आणि दडपशाहीचे विरुद्ध लोकशाही अशी ही निवडणूक आहे संविधान वाचविण्यासाठी ही निवडणूक जिंकणे अत्यंत महत्त्वाची असल्याचे अमर काळे यांनी बोलतांना सांगितले.