टिम लोकप्रवाह, वर्धा (सचिन ओली) दि. ०४ – वर्धा जिल्हा हा गांधी जिल्हा आणि काँग्रेसचा गड म्हणून संपूर्ण नावलौकिक असतांना याच जिल्ह्यातुन काँग्रेसला हद्दपार करण्याचे काम शरद पवारांनी केले. जिल्हा काँग्रेसमुक्त करण्याचे आमचे स्वप्न होते. साकार करण्याचे काम मात्र पवारांनी केलं, त्यामुळे आम्ही त्यांचे आभारी आहोत, अशी टीका फडणवीस यांनी रामदास तडस यांचे लोकसभा उमेदवारी अर्ज दाखल केल्यानंतर आयोजीत सभेस केली. यावेळी मंचावर प्रदेशाध्यक्ष चंद्रशेखर बावनकुळे, खासदार अनिल बोंडे, उमेदवार रामदास तडस, आमदार दादाराव केचे, समीर कुणावार, प्रताप अडसड, पंकज भोयर, अशोक उईके, रामदास आंबटकर, राष्ट्रवादीचे सूबोध मोहिते, सरिता गाखरे, गणेश ईखार, अशोक शिंदे, आशिष देशमुख, सुनील गफाट, सुधीर दिवे, सुमित वानखेडे, विजय आगलावे, सुरेश वाघमारे, राजेश बकाने, परिमल कांबळे व ईश्वर बाळबुद्धे आदिंची उपस्थिती होती.
विरोधकांचा खरपूस समाचार घेतांना फडणवीस म्हणाले की, काँग्रेसमुक्त नारा आम्ही दिला जिल्हापरिषद, नगरपरिषद, आमदारकी आम्ही जिंकलो, पण वर्धेतून ‘पंजा’ गायब करता आला नाही परंतु पवार साहेबांनी गांधी जिल्ह्यातून ते करून दाखविलले. जे आमचे स्वप्नं होते ते पवारांनी पूर्ण केले. महात्मा गांधींच्या नावाने इतके वर्ष राजकारण केले. त्याच पावन भूमीतून काँग्रेसला उमेदवार सापडेना, ही फार लाजिरवाणी बाब आहे. आयात केलेल्या उमदेवाराचा टिकाव विधानसभेत लागत नसल्यामुळे किमान लोकसभेत शहीद होऊन नाव मोठे करावे, अशा मनीषेतून अर्ज दाखल केला की काय? अशी उपहासात्मक टीकाही त्यांनी यावेळी केली. विरोधकांच्या रेल्वे गाडीला इंजन नसल्यामुळे व आपल्याकडे विकासरुपी इंजन असल्यामुळे मोदी शिवाय दुसरा पर्याय नाही, राजकीय पटलावर यावेळी ४०० आकडा झळकणार आहे. रामदास तडस हे लोकसभेत नक्कीच हट्रिक करणार असल्याची भावना त्यांनी यावेळी व्यक्त केली.
