टिम लोकप्रवाह, चोपडा दि. 14: मा. उच्च न्यायालय, मुंबई तसेच मा. जिल्हा विधी सेवा प्राधिकरण, जळगाव यांच्या आदेशान्वये शनिवार, दि. 14 मार्च 2026 रोजी चोपडा न्यायालयात राष्ट्रीय लोक अदालत आयोजित करण्यात आली. या लोक अदालतीत दिवाणी व फौजदारी मिळून एकूण 92 प्रकरणे निकाली काढण्यात आली असून 17 लाख 95 हजार 370 रुपयांची वसुली करण्यात आली.
चोपडा न्यायालयात प्रलंबित असलेल्या दिवाणी व फौजदारीच्या 451 प्रकरणांपैकी 77 प्रकरणे निकाली काढण्यात आली. यात फौजदारीची 53 प्रकरणे, धनादेश अनादराची 9 प्रकरणे, पती-पत्नीच्या कौटुंबिक वादाचे 1 प्रकरण तसेच दिवाणीची 14 प्रकरणे निकाली काढण्यात आली. या प्रकरणांमधून 14 लाख 11 हजार रुपयांची वसुली करण्यात आली. तसेच बँक ऑफ इंडिया, स्टेट बँक ऑफ इंडिया, सेंट्रल बँक ऑफ इंडिया, बँक ऑफ महाराष्ट्र, बँक ऑफ बडोदा, बीएसएनएल तसेच महाराष्ट्र राज्य वीज मंडळ यांच्या दाखलपूर्व एकूण 2579 प्रकरणांपैकी 15 प्रकरणे निकाली काढण्यात आली. या प्रकरणांमधून 3 लाख 84 हजार 370 रुपयांची वसुली झाली.
राष्ट्रीय लोक अदालतीला सकाळी 10.30 वाजता सुरुवात झाली. यावेळी पॅनलवर दिवाणी न्यायाधीश श्री. एस. डब्ल्यू. शेगोकार यांच्या अध्यक्षतेखाली सहपंच म्हणून ॲड. बी. आर. पाटील, चोपडा वकील संघाचे सदस्य तसेच सरकारी अभियोक्ता नितीन माळी उपस्थित होते.
या कार्यक्रमाच्या यशस्वीतेसाठी बार असोसिएशनचे वकील सदस्य, पोलिस कर्मचारी, सहाय्यक अधीक्षक, न्यायालयीन कर्मचारी, विविध बँकांचे शाखा अधिकारी तसेच महाराष्ट्र राज्य वीज मंडळ व बीएसएनएलचे अधिकारी यांचे सहकार्य लाभले. पॅनल प्रमुखांनी कार्यक्रम यशस्वी करण्यासाठी सहकार्य करणाऱ्या सर्वांचे आभार व्यक्त केले.
