चोपडा नगरपरिषद सर्वसाधारण सभा ठरली वादळी!

काटकसरीच्या निर्देशांकडे दुर्लक्ष – विरोधी पक्षाचा आरोप

गटनेते जैस्वाल यांनी सांगितले की, शासनाच्या निर्देशांनुसार नगरपरिषदांनी अधिकारी व पदाधिकाऱ्यांच्या वाहनावरील खर्चात कपात करणे अपेक्षित आहे. तरीही नगराध्यक्षांच्या वाहनासाठी इंधन व चालक उपलब्ध करून देण्याच्या प्रस्तावाला विरोधी सदस्यांनी कडाडून विरोध केला.

या चर्चेदरम्यान नगराध्यक्षांनी “मग मी नगरपरिषदेच्या खर्चातून ४० लाखांची गाडी घेते” असे वक्तव्य केल्याचा आरोपही जैस्वाल यांनी केला. जनतेच्या करातून येणाऱ्या निधीबाबत हे वक्तव्य असंवेदनशील असल्याचे त्यांनी म्हटले.

दालन नूतनीकरणाच्या प्रस्तावावरही प्रश्नचिन्ह

सभेत विषय क्रमांक ३४ अंतर्गत नगराध्यक्ष व उपनगराध्यक्ष यांच्या दालनांच्या नूतनीकरणाचा प्रस्तावही ठेवण्यात आला. सिव्हिल वर्क आणि फर्निचरवर खर्च करण्याचा प्रस्ताव असताना, सध्या नगरपरिषदेत सुसज्ज एसी दालन उपलब्ध असतानाही अनावश्यक तोडफोड व खर्च का करायचा, असा सवाल विरोधी सदस्यांनी उपस्थित केला.

विरोधी सदस्यांच्या म्हणण्यानुसार, नगरपरिषदेत ९५ कंत्राटी कामगारांना मागील पाच महिन्यांपासून वेतन मिळालेले नाही, तसेच अनेक बिले प्रलंबित आहेत. अशा परिस्थितीत निधीचा वापर जनतेच्या हितासाठीच होणे आवश्यक असल्याचे त्यांनी नमूद केले.

“सभेची गरिमा टिकवणे महत्त्वाचे”

नगरपरिषद सर्वसाधारण सभा ही लोकशाहीचे प्रतीक असून ती कुठल्याही हुकूमशहाचा दरबार नाही, असे संध्या महाजन यांनी सांगितले. सभेदरम्यान मंजूर विषयांचे वाचन करू न देणे, सदस्यांना पुरेसा वेळ न देणे अशा प्रकारांबाबत त्यांनी नाराजी व्यक्त केली. या संदर्भात कलम ३०८ अंतर्गत पुढील कारवाई करण्याचा इशारा त्यांनी दिला.