लोकप्रवाह, चोपडा दि. ०२ जून – पारंपारिक रितिरिवाजांप्रमाणे आत्तापर्यंत आई वडिलांचे निधन झाल्यास मुलगाच चितेला अग्नीडाग देऊन सर्व धार्मिक विधी करत होता. मात्र आता काळाने कास बदलली असून प्रथा व परंपराही काळानुरूप बदलू लागल्या आहेत. मुलगा आणि मुलगी आता समान झाली आहेत. येथे आईच्या निधनापूर्वीच भाऊ अपघातात जग सोडून गेल्याने मुलीनेच चितेला अग्निडाग दिला. दशक्रिया विधीला डोक्यावरील केसांची लटही दिली आणि दशक्रियाविधी व गंधमुक्त चे सर्व धार्मिक विधीही पार पाडले. मुलगा – मुलगी समानतेच्या दिशेने पडलेल्या धाडसी पाऊलाची फक्त चर्चाच होत नसून परिसरात कौतुकही होत आहे.
चोपडा तालुक्यातील गणपूर येथील माजी उपसरपंच युवराज रघुनाथ पाटील यांच्या पत्नी दरुबाई यांचे नुकतेच निधन झाले. त्यांच्या एकुलत्या एक मुलाचे काही वर्षांपूर्वीच निधन झाले होते. त्यांची मुलगी बबिता परेश बेहरे हिने मृत आईच्या चितेला अग्निडाग दिला. दशक्रिया विधीला डोक्यावरील केसाची लट (काही केस) देऊन दशक्रिया व गंधमुक्त विधीही पार पाडला. सर्व प्रथा व परंपरा यांना खो देत व स्त्री पुरुष समानतेच्या दिशेने उचललेल्या या धाडसी निर्णयाचे सर्वदूर कौतूक होत आहे.
