टिम लोकप्रवाह, वर्धा दिनांक 21 (सचिन ओली): एकीकडे जिल्ह्यात जिल्हाधिकारी राहुल कर्डिले यांनी अवैध गौण खनिज उत्खनन करणारे व वाळू माफियांवर कारवाईचा सपाटा सुरु केला आहे. त्यामुळे अवैध वाळू व गौणखनिज वाहतूक करणाऱ्यांचे धाबे दणाणले आहे. तर दुसरीकडे वर्धा तालुक्यातील पिपरी मेघे येथून जवळच असणाऱ्या कारला या गावाच्या हद्दीत असणाऱ्या बारसाना लेआउट च्या मालकानी चक्क वन विभाग व महसूल प्रशासनाच्या जमिनीवर अवैद्यरित्या गौणखनिज उत्खनन लाखोंचा महसूल बुडविला असल्याचा प्रकार आपचे जिल्हाध्यक्ष श्रीकांत दोड यांनी उघडकीस आणला आहे. आता यावर जिल्हाधिकारी काय कारवाई करता? याकडे संपूर्ण जिल्हावासियांचे लक्ष लागून आहे.
याबाबत सविस्तर वृत्त असे कि, तालुक्यातील कारला या गावाच्या हद्दीत असणारा लेआऊटधारक हा अवैध गौणखनिज उत्खनन करीत असल्याबाबतची तक्रार ग्रामस्थांनी आपचे जिल्हाध्यक्ष श्रीकांत दोड यांच्याकडे केली. त्यामुळे त्यांनी सदर बाबीचे गांभीर्य लक्षात घेऊन तात्काळ त्या ठिकाणी भेट दिली. व तेथील परिस्थिती बघता त्यांना गैरप्रकार होत असल्याचे निदर्शनास आल्यावर त्यांनी ताबडतोब तहसीलदार संदीप पुंडेकर यांना दूरध्वनीवर संपर्क करून कळविले असता तहसीलदार यांनी मंडळाधिकारी प्रशांत हाडे व तलाठी के. एस. बुलकुडे व रोशन खैरकार यांना त्याठिकाणी जागेचा पंचनामा करण्याकरीता पाठवले. त्यांनी पंचनामा करून सदर अहवाल हा तहसीलदार यांना सादर करणार आहेत. याच लेआऊट धराकाने वन विभागाच्या जमिनीवरही मोठे शेड बांधल्याचे सुद्धा निदर्शनास आले. त्यावर आता वनविभाग काय कारवाई करते हे सुद्धा पाहणे महत्वाचे आहे.
मंडळ अधिकारी आणि तलाठी यांनी नाल्याचे खोदकाम बघुन मौखिक चर्चा करीत असताना अंदाजे एक कोटी रुपयापेक्षा जास्तचे अवैध गौण खनिज उत्खनन झाले असल्याचे समजत आहे.
