टिम लोकप्रवाह, जळगांव दि. 02 जुलै – शेतात लागवड करण्यात आलेली सागाची झाडें तोडण्याची परवानगी मिळणेसाठी पारोळा वनपरीक्षेत्र कार्यालयातील वनपाल दिलीप भाईदास पाटील वय 52 मोडाळा, ता. पारोळा रा. देवपूर धुळे यांनी तक्रारदारांकडे आठ हजार रुपये लाचेची मागणी केली. व सदर लाचेची रक्कम वैशाली ज्ञानेश्वर गायकवाड वय 38, व्यवसाय वनपाल, चोरवड , ता. पारोळा, रा.पारोळा जि. जळगांव यांनी स्विकारतांना लाचलुचपत प्रतिबंधक विभागाच्या पथकाने रंगेहाथ पकडले.
याबाबत सविस्तर वृत्त असे की, यातील तक्रारदार हे शेतात लागवड केलेल्या सागाच्या झाडांची शेतमालकाकडून खरेदी करण्याचा व्यापार करतात. तक्रारदार यांनी पारोळा तालुक्यातील इंधवे येथील शेतकऱ्यांच्या शेतात असलेल्या सागाचे झाडे तोडण्याचा शेतकरी व तक्रारदार यांच्यात साठ हजार रुपयांचा सौदा झालेला होता. त्यानुसार सदर शेतकरी यांनी उपवन विभाग पारोळा येथून सागाची झाडे तोडण्याची परवानगी मिळण्यासाठी सदर शेतकऱ्यांनी तक्रारदार यांना अधिकार पत्र दिले होते. त्यानुसार सागाची झाडे तोडण्याची परवानगी देण्यासाठी वनपाल दिलीप भाईदास पाटील यांनी तक्रारदार यांच्याकडे आठ हजार रुपयाची लाचेची मागणी केली. त्याबाबतीत तक्रारदार यांनी दि.19/06/2025 रोजी लाचलुचपत प्रतिबंधक विभागाकडे तक्रार केली. त्याअनुषंगाने पडताळणी केली असता वनपाल दिलीप भाईदास पाटील याने 8000 ची मागणी करुन लाच स्वीकारण्याची तयारी दर्शविली. म्हणून आज दिनांक 02/07/2025 रोजी सापळा कारवाई दरम्यान तक्रारदार यांच्याकडून वनपाल दिलीप भाईदास पाटील यांचे सांगणे वरून वनपाल वैशाली ज्ञानेश्वर गायकवाड यांनी पंचासमक्ष 8000/-रुपये स्वीकारताना रंगेहात मिळून आले आहेत. वनपाल दिलीप भाईदास पाटील व वैशाली ज्ञानेश्वर गायकवाड यांना ताब्यात घेण्यात आले असून मोबाईल जप्त करण्यात आले आहे. तसेच वनपाल वैशाली ज्ञानेश्वर गायकवाड यांना नोटीस देऊन सोडण्यात आले आहे. पारोळा पोलीस स्टेशन येथे भ्रष्टाचार प्रतिबंधक अधिनियम प्र अधि . 1988 अन्वये गुन्हा दाखल करण्याची प्रक्रिया चालू आहे.
सदर कारवाई ला.प्र.वि, नाशिक परिक्षेत्र पोलीस अधीक्षक भारत तांगडे व अप्पर पोलीस अधीक्षक माधव रेड्डी यांच्या मार्गदर्शनाखाली व जळगाव लाचलुचपत प्रतिबंधक विभागाचे उपअधीक्षक योगेश ठाकूर यांच्या नेतृत्वाखाली सफौ सुरेश पाटील, मपोहेकॉ शैला धनगर, पोहेकॉ किशोर महाजन, पोकॉ राकेश दुसाने व अमोल सूर्यवंशी आदींच्या पथकाने केली.
