गुलालच्या उधळणीत आणि प्रचंड उत्साहात बाप्पाला निरोप दिला निरोप

टिम लोकप्रवाह, चोपडा दि. 12 – तरुणांमध्ये प्रचंड उत्साह आणि गुलालाची उधळण करीत जोशपूर्ण ढोल ताशांच्या निनादात गणपती विसर्जन शहरात संपन्न झाला. शहरात पाचव्या दिवशी श्रींचे विसर्जन होत असल्याने शहरातील जवळपास ७१ सार्वजनिक गणेश मंडळतर्फे गणपती बाप्पाला निरोप देण्यात आला. यावर्षी ५० च्यावर गणेश मंडळ पदाधिकारी यांचेकडून १५ फुटांपेक्षा जास्त उंचीच्या मूर्ती असल्याने मिरवणुकीस कसरत करून पार करावी लागली. त्यामुळे नेहमीपेक्षा जास्त वेळ मिरवणुकीला लागला. विसर्जन मिरवणुकीत मनसे चे माजी जिल्हाध्यक्ष अनिल वानखेडे यांचा गणपती सर्वात प्रथम सकाळी साडेनऊ वाजताच विसर्जन मार्गावरून मार्गस्थ झाला . जवळपास 18 ते 20 तास चालणारी ही मिरवणूक खऱ्या अर्थाने सायंकाळी पाच वाजेपासून सुरू होते. तालुका भरातून ग्रामीण भागातील प्रचंड भाविक भक्त या विसर्जन मिरवणुकीला पाहण्यासाठी आलेले होते. त्यामुळे गर्दीला उधान आलेले होते. शहरातील अरुंद गल्यांमुळे खोळंबा होत असतो. त्यामुळे मिरवणूक रात्री बारा वाजेपर्यंत संपू शकत नाही, परंतु यावर्षी शांतता कमिटीच्या बैठकीत पोलीस अधीक्षक महेश्वरी रेड्डी यांनी रात्री 12 वाजे पर्यंत मिरवणूक अटोपण्यासाठी प्रयत्न केले नंतर वाजंत्री वाजवली तर गुन्हे दाखल होतील आणि कोणतीही वाजंत्री वाजवता येणार नाही असा इशारा दिला होता. गणपती विसर्जन मिरवणुकीचा मार्ग हा आशा टॉकीज, गोल मंदिर, चावडी, बोहरा गल्ली, मुस्तफा बाबा मशीद, आझाद चौक, पाटील दरवाजा, बाबासाहेब आंबेडकर चौक, छत्रपती शिवाजी महाराज चौक, बस स्टँड या मार्गे नेहमीप्रमाणे पार पडली. गणपती विसर्जनाची मिरवणूक बोहरा गल्लीमध्ये रेंगाळत रेंगाळत सरकत होती. त्या ठिकाणी गणपती मंडळे लवकर पास होत नसल्याने यावर्षी चोपडा शहर पोलीस स्टेशनचे पोलीस निरीक्षक मधुकर साळवे यांनी कसब पणाला लावून मंडळ कार्यकर्त्यांना पुढे सरकवत नेले होते.

तगडा पोलीस बंदोबस्त
दरम्यान चोपडा शहरातील मिरवणुकीला गालबोट लागू नये म्हणून पोलीस अधीक्षक महेश्वरी रेड्डी यांच्या मार्गदर्शनाने चोपडा शहरात चोपडा शहर पोलीस स्टेशनचे पोलीस निरीक्षक मधुकर साळवे यांनी तगडा पोलीस बंदोबस्त ठेवलेला होता. चोपडा शहरात छावणीचे स्वरूप या बंदोबस्तानंतर प्राप्त झालेले होते. शहरातील गणपती मिरवणूक निर्विघ्नपणे पार पडावी यासाठी शहर पोलिसांना शांतता कमिटीचे सर्व सदस्य, सर्वपक्षीय प्रमुख नेते, पत्रकार सर्व पक्षाचे पदाधिकारी, पोलीस पाटील संघटना, पोलीस मित्र , शहरातील प्रतिष्ठित नागरिक यांचे सह ग्रामीण पोलीस स्टेशन चे अधिकारी पोलीस कर्मचारी हे मिरवणुकीत सहभागी झाले होते.

विविध राजकीय पक्ष व इतरांचे शुभेच्छा स्टॉल 

विविध पक्षांचे मंडळ पदाधिकारी यांना शुभेच्छा देणारे स्टॉल्स उभारण्यात आले होते. सर्व पक्षांचे स्वतंत्र असे शुभेच्छा स्टॉल्स लावण्यात आले होते.प्रत्येक मंडळ अध्यक्षांचा गुलाबपुष्प ,श्रीफळ आणि ट्रॉफी देवून सत्कार करण्यात आला.काँग्रेस,राष्ट्रवादीचे फूट पडलेले दोन्ही गटांचे,शिवसेना पक्षाचे दोन्ही गटांचे ,भाजपाचे आणि नगर पालिकेचे अधिकाऱ्यांमार्फत भ्रमणध्वनी मार्फत शुभेच्छा दिल्या स्टॉल्स लागलेले होते. विधानसभेचे माजी अध्यक्ष अरुणभाई गुजराथी, आमदार लता सोनवणे, माजी आमदार कैलास पाटील, जगदीश वळवी, प्रा.चंद्रकांत सोनवणे, काँग्रेस चे माजी जिल्हाध्यक्ष ॲड.संदीप पाटील, चोसाला चेअरमन चंद्रहसभाई गुजराथी, भाजपाचे माजी सभापती आत्माराम म्हाळके, हितेंद्र देशमुख, संजय कानडे, नंदकिशोर पाटील, किशोर चौधरी, संजीव सोनवणे, प्रदीप पाटील, नंदकिशोर सांगोरे, राजेंद्र बिटवा आदी उपस्थित होते.

नगरपालिकेकडून तापी नदीवर विसर्जनाची व्यवस्था 

शहरासह तालुक्यातील गणपती मूर्तींचे विसर्जन हे गणेश मंडळाकडून तापी नदीवर केले गेले. व ज्या गणेश मुर्त्या या मोठ्या असतील त्यांचे विसर्जन चहार्दी खदानित असणाऱ्या तलावात करण्यात आले. तापी नदीला भरपूर पाणी असल्याने मूर्तीचे विसर्जन करतांना छोट्या मोठ्या मूर्ती नगरपालिकेने ताब्यात घेऊन क्रेनने नदीपात्रात विसर्जन करण्यात आले याकामी नगरपालिका मुख्याधिकारी राहुल पाटील यांच्या मार्गदर्शनाखाली न. प. कर्मचारी आत्माराम बाविस्कर, राजेंद्र सतिश माळी, प्रकाश चव्हाण, भगवान अहिरे, राहुल निकम, प्रवीण सैदाणे, पिंटू संदांशिव, राजू माळी आदींनी याकामी परिश्रम घेतले.

पोलीस अधीक्षक व अप्पर पोलीस अधीक्षक कविता नेरकर ठाण मांडून..!!
दरम्यान विसर्जन मिरवणुकीला कोणतेही गालबोट लागू नये म्हणून जळगाव जिल्ह्याचे पोलीस अधीक्षक महेश्वरी रेड्डी, चाळीसगावचे अप्पर पोलीस अधीक्षक कविता नेरकर,चोपडा उपविभागी पोलीस अधीक्षक डॉ. कुणाल सोनवणे यांचे सह वरिष्ठ पोलीस अधिकारी चोपडा शहरात विसर्जन मिरवणूक वेळी ठाण मांडून होते.

वीज वितरण अधिकारी व कर्मचाऱ्यांचे परिश्रम 
दरम्यान यावर्षी 25 ते 30 फुटापर्यंत मुर्त्यांची उंची असल्यामुळे क्षणोक्षणी मुर्त्यांमध्ये विजेचे तार व वायर अडकत होते. त्यामुळे वीज वितरण कंपनीचे कनिष्ठ अभियंता आशिष गायकवाड,अमित सुलक्षणे व इतर कर्मचाऱ्यांनी रात्रभर अथक परिश्रम घेऊन वीज पुरवठा बंद करणे व तात्काळ सुरू करण्यासाठी मेहनत घेतली.

गुलाबी रस्त्यांचे शहर… चोपडा 

उशिरा रात्रीपर्यंत चालेल्या या विसर्जन मिरवणुकीनंतर शहरातील मिरवणूक मार्गांवर अक्षरशः गुलालचा थर साचल्यामुळे संपूर्ण शहराला गुलाबी स्वरूप प्राप्त झाल्याचे दिसून आले. या सर्व रस्त्यांची साफसफाई करण्यासाठी नगरपालिकेचे आरोग्य व स्वच्छता निरीक्षक व्हि. के. पाटील यांच्या मार्गदर्शनाखाली सर्व कर्मचारी यांनी मेहनत घेतल्याची दिसून आले.