टिम लोकप्रवाह, चोपडा दिनांक 04 : समस्त पुष्टीमार्गीय गुजराती वैष्णव समाज, जळगाव आणि एन.आर.जी. फाऊंडेशन, गुजरात सरकार यांच्या संयुक्त विद्यमाने आयोजित सामाजिक जनजागृती कार्यक्रम चोपडा येथील प्रताप विद्या मंदिरात १ नोव्हेंबर रोजी सायंकाळी उत्साहपूर्ण वातावरणात पार पडला. या कार्यक्रमाला सुमारे ८०० समाजबांधवांची उपस्थिती लाभली.
कार्यक्रमाला प्रमुख पाहुणे म्हणून महाराष्ट्र विधानसभेचे माजी अध्यक्ष अरुणभाई गुजराथी उपस्थित होते. तसेच गुजरात सरकार नियुक्त नायब तहसीलदार चैतन्य सघानी, एन.आर.जी. फाऊंडेशनचे निलेश प्रजापती आणि शिवाभाई काकड यांची प्रमुख उपस्थिती होती.
कार्यक्रमाचे विशेष आकर्षण म्हणजे भगीरथ भट यांचा इंटरनॅशनल ऑर्केस्ट्रा आणि हास्य दरबार हा मनोरंजनात्मक कार्यक्रम ठरला. सामाजिक जनजागृती करणे, समाजबांधवांमध्ये सामाजिक बांधिलकीची भावना वृद्धिंगत करणे तसेच विविध सामाजिक समस्यांविषयी जागरूकता निर्माण करणे हा या उपक्रमाचा मुख्य उद्देश होता.
यावेळी उपस्थित मान्यवरांनी सामाजिक एकोपा, जनजागृती आणि समाजाच्या विकासासाठी सामूहिक सहभागाचे महत्त्व अधोरेखित केले. कार्यक्रमाच्या यशस्वी आयोजनासाठी समस्त पुष्टीमार्गीय गुजराती वैष्णव समाजाचे जळगाव जिल्हाध्यक्ष चंद्रहास गुजराथी, सचिव मितेश पोतदार, ट्रस्टी गोविंद गुजराथी, प्रा. आशिष गुजराथी, संजय गुजराथी यांच्यासह सर्व सदस्यांनी विशेष परिश्रम घेतले.
कार्यक्रमाचे सूत्रसंचालन सौ. मृणाल गुजराथी यांनी केले. कार्यक्रमानंतर उपस्थितांसाठी स्नेहभोजनाची व्यवस्था करण्यात आली होती. समाजबांधवांच्या उत्स्फूर्त प्रतिसादात हा कार्यक्रम संपन्न झाला.
