टिम लोकप्रवाह, चोपडा दि . 04 – आगामी श्री गणेशोत्सव २०२६ शांततेत, सुरक्षिततेत आणि शिस्तीत पार पडावा, यासाठी चोपडा शहर पोलीस स्टेशनच्या हद्दीतील सर्व सार्वजनिक गणेश मंडळांना पोलिसांनी महत्त्वपूर्ण सूचना जारी केल्या आहेत. गणेश मंडळांनी उत्सवासाठी आवश्यक असलेल्या सर्व परवानग्या वेळेत घेणे बंधनकारक असून, विनापरवानगी गणेशमूर्तीची स्थापना अथवा उत्सव साजरा केल्यास संबंधित मंडळाच्या पदाधिकाऱ्यांवर कडक कायदेशीर कारवाई करण्यात येईल, असा स्पष्ट इशारा पोलिसांनी दिला आहे.
पोलिसांनी दिलेल्या सूचनेनुसार, सार्वजनिक गणेश मंडळांनी नगरपरिषद/ग्रामपंचायत, धर्मादाय आयुक्त, महावितरण तसेच खासगी जागेवर मंडप उभारण्यात येत असल्यास जागा मालकाचे ना हरकत प्रमाणपत्र (NOC) आदी आवश्यक कागदपत्रे घेऊन ऑनलाइन परवानगी फॉर्म भरावा. संबंधित परवानगी फॉर्म चोपडा शहर पोलीस स्टेशन येथे जमा करावा.
दोन दिवसांत कायदेशीर परवानगी घेण्याचे आवाहन
पोलिसांच्या निदर्शनास आले आहे की, काही गणेश मंडळांनी आतापर्यंत चोपडा शहर पोलीस स्टेशनकडून अधिकृत परवानगी घेतलेली आहे. मात्र, उर्वरित मंडळांनी कोणताही विलंब न करता लवकरात लवकर, म्हणजे दोन दिवसांत पोलीस स्टेशनशी संपर्क साधून कायदेशीर परवानगी घ्यावी, असे आवाहन करण्यात आले आहे. उशीर झाल्यास परवानगी देता येणार नाही, याची नोंद घ्यावी, असेही पोलिसांनी स्पष्ट केले आहे.
विनापरवानगी मंडप उभारल्यास कारवाई
ज्या गणेश मंडळांनी अद्याप चोपडा शहर पोलीस स्टेशनची रीतसर परवानगी घेतलेली नाही, अशा मंडळांनी सार्वजनिक ठिकाणी गणेशमूर्तीची स्थापना किंवा उत्सव साजरा केल्यास संबंधित मंडळाचे अध्यक्ष, पदाधिकारी आणि कार्यकर्त्यांवर कडक कायदेशीर कारवाई करण्यात येणार असल्याचा इशारा पोलिसांनी दिला आहे. गणेशोत्सव शांततेत व सुव्यवस्थित वातावरणात पार पाडण्यासाठी मंडळांनी पोलिस प्रशासनाला पूर्ण सहकार्य करावे आणि आवश्यक परवानगी तातडीने मिळवून घ्यावी, असे आवाहन करण्यात आले आहे.
मंडळांच्या परिसरात CCTV बंधनकारक
गणेशमूर्तीची स्थापना झाल्यानंतर मंडळाच्या परिसरात कोणताही अनुचित प्रकार घडू नये, यासाठी CCTV कॅमेरे बसविण्याच्या सूचनाही देण्यात आल्या आहेत. उत्सवादरम्यान कायदा व सुव्यवस्था अबाधित ठेवण्यासाठी मंडळांनी पोलिस प्रशासनाला सहकार्य करावे, असे पोलिसांनी म्हटले आहे.
विसर्जनाबाबतही पोलिसांचा स्पष्ट इशारा
गणेश विसर्जन मिरवणुकीच्या आदल्या रात्री कोणत्याही गणेश मंडळाने श्री गणेशाची मूर्ती चोपडा शहरातील सार्वजनिक ठिकाणी ठेवू नये. विसर्जन मिरवणुकीच्या वेळी मूर्ती लाईनमध्ये लावण्यासाठी आणावी. तसेच मिरवणूक संपल्यानंतर कोणत्याही सार्वजनिक ठिकाणी रस्त्यावर गणेशमूर्ती उभी करू नये. या नियमांचे उल्लंघन करून काही अनुचित प्रकार घडल्यास संबंधित मंडळाच्या कार्यकारिणीला जबाबदार धरून कायदेशीर गुन्हा दाखल करण्यात येईल, असा स्पष्ट इशारा देण्यात आला आहे.
नगरपरिषदेच्या अटींचे पालन आवश्यक
नगरपरिषद चोपडा यांच्याकडून परवानगी देताना घालून देण्यात आलेल्या सर्व अटी व शर्तींचे काटेकोर पालन करावे. अटी व शर्तींचे पालन केले नसल्यास संबंधित गणेश मंडळाला परवानगी देण्यात येऊ नये, अशी स्पष्ट भूमिका पोलिसांनी मांडली आहे.
