टिम लोकप्रवाह, दि. 02, जळगाव |
जिल्हा परिषद बांधकाम विभागातील लाचखोरीचा प्रकार उघडकीस आणत लाचलुचपत प्रतिबंधक विभागाच्या जळगाव पथकाने सोमवारी (दि. २ नोव्हेंबर) मोठी कारवाई केली. रस्त्याच्या काँक्रीटीकरणाच्या कामाचे बिल मंजूर करून पुढील मंजुरीसाठी पाठविण्याच्या मोबदल्यात लाचेची मागणी करून १० हजार रुपये स्वीकारल्याप्रकरणी उपविभागीय अधिकारी आणि कनिष्ठ अभियंता अशा दोघांविरुद्ध कारवाई करण्यात आली.
लाचलुचपत प्रतिबंधक विभागाच्या प्रेसनोटनुसार, सतीश मनसुलाल शिसोदे (वय ५५, उपविभागीय अधिकारी, बांधकाम उपविभाग, जिल्हा परिषद जळगाव) आणि भागवत वसंत चवरे (वय ३२, कनिष्ठ अभियंता, बांधकाम उपविभाग, जिल्हा परिषद जळगाव) अशी संबंधित अधिकाऱ्यांची नावे आहेत.
या प्रकरणातील तक्रारदार हे ४२ वर्षीय कंत्राटदार असून त्यांनी सन २०२५-२६ मध्ये पिंप्री खुर्द, ता. धरणगाव येथे गावांतर्गत रस्ता काँक्रीटीकरणाचे ९ लाख ९० हजार ७६३ रुपयांचे काम केले होते. सदर काम पूर्ण झाल्यानंतर कामाची मोजणी पुस्तिका व बिल तयार करण्यासाठी स्थापत्य अभियंता भागवत चवरे यांनी यापूर्वी तक्रारदाराकडून २० हजार रुपये स्वीकारल्याचे तक्रारीत नमूद आहे. त्यानंतर तक्रारदाराने कामाचे बिल मंजूर करण्यासाठी उपविभागीय अधिकारी सतीश शिसोदे यांच्याकडे संपर्क साधला. यावेळी आरोपी क्रमांक २ भागवत चवरे यांनी कामाच्या बिलावर सही करून ते पुढील मंजुरीसाठी जिल्हा परिषद जळगाव येथे पाठविण्याकरिता आरोपी क्रमांक १ सतीश शिसोदे यांच्यासाठी एकूण बिलाच्या १.५ टक्के प्रमाणे १५ हजार रुपयांची लाच मागितल्याची तक्रार करण्यात आली.
या तक्रारीच्या अनुषंगाने लाचलुचपत प्रतिबंधक विभागाने २ नोव्हेंबर रोजी पडताळणी करून सापळा रचला. यावेळी आरोपी क्रमांक २ भागवत चवरे यांनी तक्रारदाराकडून पंचांसमक्ष १० हजार रुपये स्वीकारले व ही रक्कम आरोपी क्रमांक १ सतीश शिसोदे यांच्याकडे दिली. शिसोदे यांनीही सदर रक्कम स्वीकारून स्वतःकडे ठेवली. त्यानंतर ही लाचेची रक्कम पंचांसमक्ष जप्त करण्यात आली.
या कारवाईदरम्यान आरोपी क्रमांक १ यांच्या अंगझडतीत अ‍ॅपल कंपनीचा एक मोबाईल व ९१ हजार ६२० रुपये रोख रक्कम, तर आरोपी क्रमांक २ यांच्या अंगझडतीत विवो कंपनीचा एक मोबाईल व २० हजार ६०० रुपये रोख रक्कम मिळून आली.
या प्रकरणी जिल्हापेठ पोलीस ठाणे येथे भ्रष्टाचार प्रतिबंध अधिनियम १९८८ मधील कलम ७ , १२ अन्वये गुन्हा दाखल करण्याची प्रक्रिया सुरू असल्याचे प्रेसनोटमध्ये नमूद आहे. ही कारवाई पोलीस निरीक्षक रेश्मा अवतारे यांच्या नेतृत्वाखाली करण्यात आली. या कारवाईवर पोलीस उपअधीक्षक योगेश ठाकूर यांचे पर्यवेक्षण होते. सापळा पथकात पोलीस हवालदार बाळू मराठे व संगीता पवार यांचा सहभाग होता.
जिल्हा परिषद बांधकाम विभागातील या कारवाईमुळे प्रशासकीय वर्तुळात खळबळ उडाली आहे.
