टिम लोकप्रवाह, चोपडा दि. 15 : चहार्डी येथील प्राथमिक आरोग्य केंद्र परिसरात रात्रीच्या वेळी बिबट्याचा वावर आढळून आल्याने परिसरातील नागरिकांमध्ये भीतीचे वातावरण निर्माण झाले आहे. वन्यजीव छायाचित्रकार राजेंद्र धनगर यांनी या बिबट्याचे छायाचित्र आपल्या कॅमेऱ्यात टिपल्याने परिसरात बिबट्याचा वावर असल्याचे स्पष्ट झाले आहे.

चहार्डी प्राथमिक आरोग्य केंद्र परिसर तसेच लगतच्या भागात रात्रीच्या सुमारास बिबट्या फिरत असल्याचे निदर्शनास आले आहे. विशेष म्हणजे, प्राथमिक आरोग्य केंद्र हे नागरिकांच्या सतत संपर्कातील ठिकाण असून, रात्रीच्या वेळी रुग्ण, त्यांचे नातेवाईक आणि आरोग्य कर्मचारी यांचीही ये-जा सुरू असते. अशा संवेदनशील ठिकाणी बिबट्याचा वावर असल्याने नागरिकांच्या सुरक्षिततेचा प्रश्न निर्माण झाला आहे.

दरम्यान, वन्यजीव छायाचित्रकार राजेंद्र धनगर यांनी बिबट्याचे स्पष्ट छायाचित्र टिपले असून, या घटनेमुळे ग्रामस्थांमध्ये अधिकच चिंता वाढली आहे. बिबट्याच्या संभाव्य हल्ल्याच्या भीतीने रात्रीच्या वेळी घराबाहेर पडणेही नागरिकांना धोकादायक वाटू लागले आहे.

या पार्श्वभूमीवर ग्रामस्थांनी वनविभागाने तातडीने घटनास्थळी पाहणी करावी, परिसरात नियमित गस्त वाढवावी तसेच बिबट्याला पकडण्यासाठी योग्य ठिकाणी पिंजरा लावावा, अशी मागणी केली आहे. वनविभागाने या घटनेकडे गांभीर्याने लक्ष देऊन नागरिकांच्या सुरक्षिततेसाठी त्वरित प्रतिबंधात्मक उपाययोजना कराव्यात, अशी अपेक्षा चहार्डी ग्रामस्थांकडून व्यक्त होत आहे.













