गणपूर, चोपडा दि. १७ जुलै – शिक्षण हे वाघिणीचे दूध असून जो ते प्राशन करेल तो गुरगुरल्याशिवाय राहणार नाही. त्यासाठी प्रत्येकाने शिक्षण घेतले पाहिजे, असे मत पत्रकार अॕड. बाळकृष्ण पाटील यांनी येथील विकास माध्यमिक विद्यालयात संस्था वर्धापन दिनानिमित्त आयोजित कार्यक्रमात अध्यक्ष पदावरून बोलतांना मांडले. यावेळी प्रदीप पाटील, विजय पाटील, किरण करंदीकर प्रमुख पाहुणे म्हणून उपस्थित होते.
शेंदूर्णी शिक्षण संस्थेचा 78 वा वर्धापन दिन येथे साजरा करण्यात आला. यावेळी संस्थेच्या सर्व शाखांची माहिती असलेल्या खास पुरवणीचे विमोचनही यावेळी मान्यवरांच्या हस्ते करण्यात आले. दहावीत प्रथम आलेल्या विद्यार्थिनीस बक्षीस यावेळी प्रदान करण्यात आले. प्रतिमा पूजन, ईशस्तवन व स्वागत गीतानंतर मुख्याध्यापक पी एस बाविस्कर यांनी शेंदुर्णी शिक्षण संस्थेच्या पंधरा शाखा व त्यांच्या विस्ताराबद्दल माहिती दिली. संस्थेबद्दल डी पी पाटील, स्वाती पाटील व विद्यार्थ्यांनी विचार मांडले. कार्यक्रमाचे सुत्रसंचालन रमेश सावकारे यांनी केले तर आभारप्रदर्शन डी बी पारधी यांनी केले. कार्यक्रमाला शिक्षक व विद्यार्थी उपस्थित होते.
