जळगाव | प्रतिनिधी : सार्वजनिक बांधकाम विभाग, जळगाव येथील शाखा अभियंता वर्ग-२ योगेश अभिमन्यू अहिरे (वय ४४) यांना ५ लाख रुपयांची लाच स्वीकारताना लाचलुचपत प्रतिबंधक विभागाने (एसीबी) रंगेहाथ पकडल्याने जिल्ह्यात मोठी खळबळ उडाली आहे. ही कारवाई दि. ०९ मे २०२६ रोजी जळगाव येथे करण्यात आली.
लाचलुचपत प्रतिबंधक विभागाकडून प्राप्त माहितीनुसार, तक्रारदार हे सब-कॉन्ट्रॅक्टर असून जळगाव शहरातील वॉर्ड क्रमांक १४ परिसरातील सिमेंट काँक्रीट रस्त्याच्या कामा संदर्भातील बिल मंजुरीसाठी सार्वजनिक बांधकाम विभागाकडे पाठपुरावा करीत होते. संबंधित कामाचे एकूण बिल सुमारे ८० लाख ३१ हजार ४८२ रुपये इतके होते. त्यापैकी काही रक्कम अदा करण्यात आली होती, तर उर्वरित बिल मंजूर करून देण्यासाठी शाखा अभियंता योगेश अहिरे यांनी तक्रारदाराकडे तब्बल १८ लाख रुपयांच्या लाचेची मागणी केल्याचे समोर आले.
तक्रारदार यांनी याबाबत लाचलुचपत प्रतिबंधक विभाग, जळगाव येथे लेखी तक्रार दाखल केली होती. विभागाने तक्रारीची पडताळणी केल्यानंतर संबंधित अधिकाऱ्याने तडजोडीअंती १५ लाख रुपयांवर सहमती दर्शवून त्यापैकी पहिला हप्ता म्हणून ५ लाख रुपये स्वीकारण्याचे निश्चित केल्याचे निष्पन्न झाले. त्यानुसार एसीबीच्या पथकाने नियोजनबद्ध सापळा रचला. दि. ०९ मे रोजी आरोपी योगेश अहिरे यांनी तक्रारदाराकडून ५ लाख रुपयांची रक्कम स्वीकारल्याचे निष्पन्न झाले. सदर रक्कम त्यांच्या वाहनातील सीटखाली ठेवण्यात आल्याचेही कारवाई दरम्यान उघड झाले. यानंतर एसीबी पथकाने त्यांना तत्काळ ताब्यात घेतले. या प्रकरणी जळगाव शहर पोलीस ठाण्यात भ्रष्टाचार प्रतिबंधक अधिनियम १९८८ अन्वये कलम ७, ७अ व १२ प्रमाणे गुन्हा नोंदविण्याची प्रक्रिया सुरू करण्यात आली आहे.
ही कारवाई पोलिस उपअधीक्षक योगेश ठाकूर यांच्या मार्गदर्शनाखाली पोलिस निरीक्षक रेश्मा अवतारे यांच्या नेतृत्वाखालील पथकाने यशस्वीरित्या पार पाडली. तपास सहाय्यक पोलिस अधीक्षक योगेश ठाकूर करीत आहेत. दरम्यान, लाचलुचपत प्रतिबंधक विभागाने नागरिकांना आवाहन केले असून, कोणताही शासकीय अधिकारी अथवा कर्मचारी कामाच्या मोबदल्यात लाचेची मागणी करीत असल्यास तत्काळ विभागाशी संपर्क साधून तक्रार नोंदवावी, असे म्हटले आहे.
