टिम लोकप्रवाह, जळगाव, दि. २२ : लाचलुचपत प्रतिबंधक विभाग यांच्या जळगाव पथकाने मोठी कारवाई करत जामनेर येथील उपनिबंधक सहकारी संस्था कार्यालयातील अधिकाऱ्याकडून तब्बल १ कोटी ७७ लाख ४४ हजार ०७५ रुपयांचा सोन्या-चांदीचा व रोख रकमेचा मुद्देमाल जप्त केला आहे. या कारवाईमुळे जिल्ह्यात मोठी खळबळ उडाली आहे.
मिळालेल्या माहितीनुसार, जगदीश बाबूराव बारी (वय ५५) हे उपनिबंधक, सहकारी संस्था कार्यालय, जामनेर येथे कार्यरत आहेत. त्यांच्या विरोधात जिल्हापेठ पोलीस ठाण्यात भ्रष्टाचार प्रतिबंधक अधिनियमांतर्गत गुन्हा दाखल करण्यात आला आहे. त्यानंतर लाचलुचपत प्रतिबंधक विभागाने त्यांच्या मालमत्तेची तपासणी व झडती कारवाई केली. या कारवाईदरम्यान अधिकाऱ्यांच्या ताब्यातून मोठ्या प्रमाणावर सोन्याचे दागिने, चांदीचे दागिने तसेच रोख रक्कम आढळून आली. जप्त करण्यात आलेल्या मुद्देमालामध्ये सोन्याचे हार, बांगड्या, अंगठ्या व इतर दागिन्यांचा समावेश असून रोख रक्कमही हस्तगत करण्यात आली आहे. या सर्व मुद्देमालाची एकूण किंमत १,७७,४४,०७५ रुपये इतकी असल्याचे एसीबीने स्पष्ट केले आहे.
लाचलुचपत प्रतिबंधक विभागाच्या अधिकाऱ्यांनी २० मे २०२६ रोजी ही कारवाई केली. आरोपी अधिकाऱ्याला अटक करण्यात आली असून पुढील चौकशी सुरू आहे. या प्रकरणामुळे सहकार विभागात एकच खळबळ उडाली असून एसीबीकडून आर्थिक व्यवहारांची सखोल चौकशी केली जात आहे. ही कारवाई पोलीस अधीक्षक, लाचलुचपत प्रतिबंधक विभाग यांच्या मार्गदर्शनाखाली करण्यात आली. तपास पथकात वरिष्ठ अधिकारी व कर्मचाऱ्यांचा समावेश होता. दरम्यान, भ्रष्टाचारासंबंधी कोणतीही माहिती असल्यास नागरिकांनी लाचलुचपत प्रतिबंधक विभागाशी संपर्क साधावा, असे आवाहन विभागाकडून करण्यात आले आहे.
