टिम लोकप्रवाह, चोपडा : महाराष्ट्र शासनाच्या दि. 25 मार्च 2026 रोजीच्या महत्वपूर्ण शासन निर्णयाच्या प्रभावी अंमलबजावणीसाठी चोपडा शहरातील शासकीय जमिनीवरील दि. 1 जानेवारी 2011 पर्यंत अस्तित्वात असलेल्या निवासी अतिक्रमणांच्या नियमितीकरणाबाबत उपविभागीय अधिकारी, अमळनेर मयुर भंगाळे यांच्या अध्यक्षतेखाली आढावा बैठक घेण्यात आली. याप्रसंगी चोपडा तहसीलदार भाऊसाहेब थोरात, चोपडा नगरपरिषद मुख्याधिकारी रामनिवास झंवर यांच्यासह नगरपरिषदेचे संबंधित अधिकारी उपस्थित होते.
बैठकीदरम्यान चोपडा शहरातील विविध भागांमधील शासकीय जमिनी, त्यावरील निवासी अतिक्रमणांची सद्यस्थिती, संबंधित आरक्षणे तसेच शासन निर्णयानुसार पात्रतेच्या अटी यांचा सविस्तर आढावा घेण्यात आला. पात्र लाभार्थ्यांना नियमितीकरण प्रक्रियेचा लाभ मिळण्यासाठी आवश्यक ती कार्यवाही गतिमान करण्याच्या सूचना यावेळी प्रशासनाला देण्यात आल्या. योजनेबाबत नागरिकांमध्ये व्यापक जनजागृती व्हावी यासाठी शहरातील प्रमुख चौक व सार्वजनिक ठिकाणी माहितीपर बॅनर लावणे, घंटागाडी तसेच विविध प्रसार माध्यमांच्या साहाय्याने प्रचार-प्रसार करण्याच्या सूचना देण्यात आल्या. तसेच संबंधित नागरिकांना अर्ज प्रक्रिया सुलभ व्हावी यासाठी तात्काळ अर्ज वितरण सुरू करण्याचे निर्देशही देण्यात आले.
नागरिकांना आवश्यक मार्गदर्शन उपलब्ध व्हावे या उद्देशाने स्वतंत्र ‘अतिक्रमण नियमानुकूल मदत कक्ष’ (Help Desk) सुरू करण्याबाबत आदेश देण्यात आले असून, उपविभागीय अधिकारी, अमळनेर यांच्या उपस्थितीत सदर मदत कक्ष कार्यान्वित करण्यात आला. या मदत कक्षामार्फत नागरिकांना अर्ज भरण्याची प्रक्रिया, आवश्यक कागदपत्रे, पात्रतेच्या अटी तसेच नियमितीकरण प्रक्रियेबाबत सविस्तर मार्गदर्शन उपलब्ध करून दिले जाणार आहे.
यावेळी काही नागरिक अर्ज व आवश्यक कागदपत्रांबाबत चौकशीसाठी उपस्थित होते. उपविभागीय अधिकारी मयुर भंगाळे यांच्या हस्ते संबंधितांना अर्जांचे वितरण करण्यात आले तसेच ही माहिती व अर्ज प्रक्रिया जास्तीत जास्त नागरिकांपर्यंत पोहोचविण्याचे आवाहन करण्यात आले.
शासकीय जमिनीवरील अतिक्रमण नियमितीकरणासाठी पात्र ठरणाऱ्या नागरिकांनी शासन निर्णयाचा लाभ घेण्यासाठी आवश्यक कागदपत्रांसह विहित मुदतीत अर्ज सादर करावेत तसेच अर्ज प्रक्रियेदरम्यान उद्भवणाऱ्या अडचणींच्या निराकरणासाठी मदत कक्षाचा लाभ घ्यावा, असे आवाहन उपविभागीय अधिकारी, अमळनेर श्री. मयुर भंगाळे यांनी केले आहे.
