🚨 स्पेशल रिपोर्ट | पदभार स्विकारताच धडाकेबाज कारवाई !!

टीम लोकप्रवाह, चोपडा दि. 19 : चोपडा शहर पोलीस स्टेशनमध्ये नव्याने पदभार स्वीकारलेल्या पोलीस निरीक्षक पवन देसले यांनी कार्यभार हाती घेतल्यानंतर अवघ्या काही तासांतच धडाकेबाज कारवाई करत अवैध दारू व्यवसायावर मोठा आघात केला आहे. या कारवाईमुळे शहरात पोलीस प्रशासनाबाबत सकारात्मक संदेश गेला आहे.

कारवाई दरम्यान उपस्थित पोलीस निरीक्षक पवन देसले व पोलीस कर्मचारी…

मिळालेल्या माहितीनुसार, दि. 18 एप्रिल 2026 रोजी रात्री सुमारे 11 वाजण्याच्या सुमारास गिरिराज लॉन्सजवळील पत्री शेडमध्ये सुरू असलेल्या अवैध दारू विक्रीवर पोलिसांनी छापा टाकला. या कारवाईत आरोपी रविंद्र दिनकर पाटील (वय 40), राजवर्धन संजय पाटील (वय 31) व कपिल संजय पाटील (वय 30) यांना ताब्यात घेण्यात आले.

याठिकाणी महाराष्ट्र दारूबंदी कायद्याचे उल्लंघन करून बनावट दारू तयार करून विक्री केली जात असल्याचे तपासात निष्पन्न झाले. पोलिसांनी छाप्यातून विविध प्रकारच्या दारूच्या बाटल्या, रसायने, साहित्य व इतर वस्तू असा एकूण ₹1,08,080/- किमतीचा मुद्देमाल जप्त केला आहे.

याप्रकरणी चोपडा शहर पोलीस स्टेशनमध्ये गुन्हा क्र. 151/2026 अंतर्गत भारतीय दंड संहिता कलम 123, 318(4), 336(3), 349, 350(2) तसेच महाराष्ट्र दारूबंदी अधिनियम अंतर्गत गुन्हा दाखल करण्यात आला आहे. सदर गुन्ह्याचा तपास पोलीस निरीक्षक पवन देसले यांच्या मार्गदर्शनाखाली पोलीस उपनिरीक्षक सचिन चौधरी करीत आहेत.

पोलीस निरीक्षकांनी पदभार स्विकारल्यानंतर तात्काळ कारवाई करून गुन्हेगारीवर नियंत्रण ठेवण्याचा स्पष्ट संदेश दिला आहे. या कारवाईमुळे परिसरातील अवैध व्यवसायांवर पोलिसांचे बारीक लक्ष असल्याचे दिसून येत आहे.

Post Views: 447