टिम लोकप्रवाह, चोपडा | ३० ऑगस्ट – राष्ट्रवादी काँग्रेस पक्ष – शरदचंद्र पवार यांच्या महाराष्ट्र प्रदेश प्रवक्तेपदी डॉ. चंद्रकांत बारेला यांची नियुक्ती करण्यात आली आहे. पक्षाच्या राज्यस्तरीय प्रवक्त्यांच्या नव्या यादीत डॉ. बारेला यांचा समावेश करण्यात आला असून, पक्षाची भूमिका तसेच जनतेशी संबंधित विविध प्रश्न माध्यमांसमोर प्रभावीपणे मांडण्याची महत्त्वपूर्ण जबाबदारी त्यांच्यावर सोपविण्यात आली आहे.
डॉ. चंद्रकांत बारेला हे पक्षाच्या आदिवासी सेलचे कार्याध्यक्ष म्हणून कार्यरत आहेत. आदिवासी समाजासह ग्रामीण भागातील नागरिक, युवक आणि वंचित घटकांच्या विविध प्रश्नांसाठी ते सातत्याने कार्यरत आहेत. वैद्यकीय क्षेत्रातील पार्श्वभूमीसोबतच सामाजिक व राजकीय क्षेत्रातील त्यांचा सक्रिय सहभाग आणि संघटनात्मक अनुभव यामुळे त्यांची प्रदेश प्रवक्तेपदी झालेली नियुक्ती महत्त्वपूर्ण मानली जात आहे.
राज्यातील सामाजिक न्याय, शिक्षण, रोजगार, आरोग्य, शेतकरी, आदिवासी समाज, युवक व महिला यांच्याशी संबंधित प्रश्नांना प्रभावीपणे मांडण्यासाठी आपण प्रयत्नशील राहणार असल्याचे डॉ. बारेला यांनी सांगितले.
दरम्यान, डॉ. बारेला यांच्या नियुक्तीबद्दल पक्षाचे पदाधिकारी व कार्यकर्त्यांसह विविध सामाजिक क्षेत्रातील मान्यवरांकडून त्यांचे अभिनंदन करण्यात येत असून, त्यांच्या पुढील सामाजिक व राजकीय वाटचालीस शुभेच्छा व्यक्त करण्यात येत आहेत.
