टिम लोकप्रवाह, चोपडा : जयहिंद क्रिकेट क्लब, चोपडा (चोपडा नवचेतना बहुउद्देशीय संस्था संचलित) यांच्या वतीने सामाजिक बांधिलकी जपत विविध समाजोपयोगी उपक्रम राबविण्यात येत आहेत. ‘चोपडा प्रीमियर लीग (CPL-3)’ या क्रिकेट स्पर्धेच्या माध्यमातून ‘Play for a Cause — खेळासाठी… समाजासाठी…’ हा सामाजिक संदेश देत स्पर्धेतून संकलित निधीचा उपयोग गरजूंसाठी करण्यात आला.
CPL-3 मधून संकलित निधीतून हरताळकर हॉस्पिटल, चोपडा येथील डायलिसिस सेंटरमधील गरीब व गरजू रुग्णांच्या मोफत उपचारासाठी ₹१.५० लाखांचा निधी सुपूर्द करण्यात आला. तसेच उर्वरित निधीतून चोपडा तालुक्यातील विविध शाळांमधील गरजू विद्यार्थ्यांना शैक्षणिक साहित्याचे वाटप करण्यात आले.
या शैक्षणिक साहित्य वाटपाच्या उपक्रमासाठी ‘एक वीट माझी’ सामाजिक संस्थेचे संचालक गौरव महाले यांनी आर्थिक सहकार्य केले. त्यांच्या सहकार्यामुळे गरजू विद्यार्थ्यांना शैक्षणिक साहित्य उपलब्ध करून देण्याच्या उपक्रमाला हातभार लागला. याबद्दल जयहिंद क्रिकेट क्लबच्या वतीने त्यांचे आभार व्यक्त करण्यात आले.
कार्यक्रमाच्या अध्यक्षस्थानी चोपडा शहर पोलीस निरीक्षक पवन देसले होते. प्रमुख अतिथी म्हणून ‘एक वीट माझी’ सामाजिक संस्थेचे संचालक गौरव महाले, साईबाबा हॉस्पिटलचे संचालक डॉ. सचिन काटे तसेच न्यू बापू टी हाऊसचे संचालक राहुल महाजन उपस्थित होते.
यावेळी जयहिंद क्रिकेट क्लबचे अध्यक्ष चंद्रशेखर साखरे, उपाध्यक्ष मनोहर पाटील, सचिव रुपेश पाटील यांच्यासह क्लबचे सर्व सन्माननीय सदस्य उपस्थित होते. विद्यार्थ्यांना शैक्षणिक साहित्याचे वाटप करण्यात आले. कार्यक्रमाचे सूत्रसंचालन नंदकिशोर देशमुख सर यांनी केले. प्रास्ताविक रुपेश पाटील यांनी केले, तर आभार गोपाल शिंपी यांनी मानले.
