लोकप्रवाह, अमळनेर, दि.१३ – महसूल विभागामार्फत जमा केलेल्या डंपरवर कारवाई न करता सोडण्याच्या मोबदल्यात तक्रारदार यांचेकडे शहर तलाठी गणेश राजाराम महाजन व मंडळाधिकारी दिनेश शामराव सोनवणे यांनी पंचासमक्ष 1,50,000/-रुपये लाचेची मागणी केली व सदर मागणी केलेली लाचेची रक्कम शहर तलाठी गणेश राजाराम महाजन यांनी तलाठी कार्यालय अमळनेर येथे पंचांसमक्ष स्वीकारताच दोघांना लाचलुचपत प्रतिबंधक विभागाने रंगेहात पकडले.
याबाबत सविस्तर वृत्त असे की, अमळनेर येथील ३० वर्षीय तक्रारदार यांचा अमळनेर शहरात व तालुक्यात बिल्डींग मटेरीयल सप्लायर्सचा व्यवसाय आहे. सदर व्यवसायासाठी त्यांच्याकडे स्वतःच्या मालकीचे 3 डंपर आहेत व करारनामा तत्वावर विकत घेतलेले 3 डंपर आहेत. त्यापैकी करारनामा तत्वावर विकत घेतलेले डंपर क्रं.MH18 AA 1153 हे अमळनेर शहरात माती वाहतूक करतांना सुमारे 2 महिन्यापुर्वी तहसील कार्यालय अमळनेर येथे जमा करण्यात आलेले होते. सदरचे डंपरवर कारवाई न करता सोडण्याच्या मोबदल्यात तक्रारदार यांचेकडे गणेश राजाराम महाजन, वय-४६ वर्ष, व्यवसाय-नोकरी, तलाठी, अमळनेर शहर. रा.नविन बस स्टॅण्डजवळ, पाळधी, ता.धरणगाव व दिनेश शामराव सोनवणे, वय-४८ वर्षे, व्यवसाय-नोकरी, मंडळ अधिकारी, अमळनेर रा.फरशी रोड, अमळनेर. ता.अमळनेर यां दोघांनी पंचासमक्ष 1,50,000/-रुपये लाचेची दि.१२/१०/२०२२ रोजी मागणी केली व सदर मागणी केलेली लाचेची रक्कम 1,50,000/-रुपये दि. १३/१०/२०२२ रोजी शहर तलाठी गणेश महाजन यांनी तलाठी कार्यालय, अमळनेर येथे पंचांसमक्ष स्वीकारली म्हणून गुन्हा दाखल करुन दोघांना अटक करण्यात आली आहे.
सदर कारवाई लाचलुचपत प्रतिबंधक विभाग नाशिक परिक्षेत्राचे पोलीस अधिक्षक सुनिल कडासने, अप्पर पोलीस अधीक्षक एन.एस.न्याहळदे, वाचक पोलीस उप अधीक्षक सतीश डी.भामरे यांचे मार्गदर्शनाखाली व पोलीस उपअधीक्षक शशिकांत एस.पाटील यांचे नेतृत्वात स.फौ. दिनेशसिंग पाटील, स.फौ. सुरेश पाटील, पो.हे.कॉ. अशोक अहीरे, पो.हे.कॉ. सुनिल पाटील, पो.हे.कॉ.रविंद्र घुगे, म.पो.हे.कॉ. शैला धनगर, पो.ना.जनार्दन चौधरी, पो.ना.किशोर महाजन, पो.ना. बाळु मराठे, पो.ना. सुनिल वानखेडे, पो.ना. ईश्वर धनगर, पो.कॉ. महेश सोमवंशी, पो.कॉ. प्रदिप पोळ, पो.कॉ. राकेश दुसाने, पो.कॉ. सचिन चाटे, पो.कॉ. प्रणेश ठाकुर, पो.कॉ. अमोल सुर्यवंशी आदिंच्या पथकाने केली. सदर गुन्ह्याचा पुढील तपास लाचलुचपत प्रतिबंधक विभाग, जळगांव पोलीस निरिक्षक एन.एन.जाधव करीत आहेत.
