लोकप्रवाह, चोपडा दि. १६ जून – तालुक्यातील माध्यमिक विद्यालय व जिल्हा परिषद शाळा, नागलवाडी यांनी दि. १५ रोजी शाळेच्या पहिल्या दिवसाचे औचित्याने संपूर्ण गावात घोषणा देत प्रभात फेरी काढून नविन शैक्षणिक वर्ष प्रवेशोत्सव साजरा करण्यात आला. प्रभात फेरीमुळे पालक व विद्यार्थ्यांमध्ये जनजागृती होत उत्साह व जल्लोषाचे वातावरण निर्माण झाले. यावेळी उपसरपंच सचिन पाटील, तसेच पालक प्रतिनिधी सतेसिंग वाघ, नागलवाडी केंद्रप्रमुख व जि.प. शाळेचे मुख्याध्यापक व्ही.जी.पाटील, माध्यमिक विद्यालयाचे मुख्याध्यापक आर.बी.पाटील यांनी विद्यार्थ्यांना पुष्पगुच्छ देऊन स्वागत केले.
यावेळी सर्व विद्यार्थ्यांना मोफत पाठ्यपुस्तके वाटप करण्यात आली. तसेच नागलवाडी गावातील इयत्ता 12 वी उत्तीर्ण झालेल्या विद्यार्थ्यांचे यावेळी शाळेचे मुख्याध्यापक आर.बी.पाटील व शिक्षकांच्या हस्ते पुष्पगुच्छ देऊन अभिनंदन करण्यात आले. याप्रसंगी दोन्ही शाळेचे शिक्षक तसेच शिक्षकेतर कर्मचारी यांची उपस्थिती होती. कार्यक्रमाचे सूत्रसंचालन उपक्रमशील शिक्षक दिपक राजपूत यांनी केले.
