लोकप्रवाह, अडावद, चोपडा दि. १२ फेब्रु. – येथील मेडीकल दुकानांवर आयोडेक्स आणि झेंडूबामच्या हुबेहूब बनावट बाटल्याची विक्री करण्याऱ्या भामाट्यास औषधी दुकानदारांच्या सजगतेने अटकाव करण्यात आला असुन त्याच्या ताब्यातील २० हजार ९०० रूपयांचे बनावट औषधी वस्तू खरे असल्याचे भासवून ग्राहक व सबंधित कंपनीची फसवणूक केल्याप्रकरणी एकास अटक करून फसवणूकीसह सुधारित प्रतीलीपी अधिनियमन कायद्यान्वये गुन्हा दाखल करण्यात आला आहे.
अडावद येथील एका मेडीकल स्टोअर्स दुकानात दि. १० रोजी सायंकाळी संशयित मनिष चतुर्भुज बजाज वय ४५ रा. रामेश्वर कॉलनी, मेहरूण जळगाव हा इमामी लिमिटेड पंश्चिम बंगाल कंपनीचे आयोडेक्स आणि झेंडूबाम च्या बाटल्याची विक्री करण्यासाठी आला. यावेळी किंमतीच्या तफावतीमुळे तसेच हुबेहूब दिसणाऱ्या बाटल्याविषयी मेडीकल चालकास संशय आला. त्यांनी हि बाब एका पोलिसास कळविल्यानंतर सदर भामट्यास पोलिस स्टेशनला घेऊन आल्यावर नकली मालाचे बिंग फुटले. सहाय्यक पोलिस निरिक्षक गणेश बुवा यांनी जळगाव येथील अन्न औषध प्रशासनाचे सहाय्यक आयुक्तांना घटनेची खातरजमा करण्यासाठी पाचारण करून घेतले. सहाय्यक आयुक्त डॉ. अनिल माधवराव माणिकराव आणि औषध निरिक्षक सोमनाथ मुळे यांनी सदर इसमाजवळील आयोडेक्स व झेंडूबामची खातरजमा केली असता रंग, वास तसेच लावलेल्या बारकोड मध्ये विसंगती आढळून आल्याने संशयित भामट्याच्या ताब्यातील इमामी लि. पश्चिम बंगाल, कोलकाता कंपनीचे झेंडूबाम एकूण नग २५० तसेच मँक्सन हेल्थ केअर प्रा.ली. कंपनीचे आयोडेक्स ३० नग असा २० हजार ९०० रूपयाचा बनावट माल हस्तगत करण्यात आला. याप्रकरणी अडावद पोलीस स्थानकात डॉ. अनिल माणिकराव यांच्या फिर्यादीवरुन संशयित मनिष चतुर्भुज बजाज याच्या विरोधात भाग ५ गुरनं. १८/२३ भादंवि ४२०, ४६५, ४६८, २७४ या कलमांसह सुधारीत अन्न भेसळ कायद्यान्वये गुन्हा दाखल करण्यात आला. संशयितास अटक करण्यात आली असून पुढील तपास सपोनि. गणेश बुवा यांच्या मार्गदर्शनाखाली पोउनि. चंद्रकांत पाटील हे करीत आहेत.
