टिम लोकप्रवाह, चोपडा ३१ मार्च : तालुक्यातील जवळपास १०५ किमी चे रस्ते जिल्हापरिषद कडे होते, त्यावर शासनाकडून निधी मिळत नव्हता. यासाठी आमदार लताताई सोनवणे यांनी प्रयत्न करून यातील ८० किमी चे रस्ते जिल्हा परिषद विभागाकडून सार्वजनिक बांधकाम विभागाकडे वर्ग करण्यात आले असून लवकरच त्यावर निधी उपलब्ध होणार असल्याची माहिती आमदार लताताई सोनवणे यांनी पत्रकार परिषदेत दिली. शासकीय विश्रामगृहात आयोजित पत्रकार परिषदेवेळी माजी आमदार प्रा. चंद्रकांत सोनवणे, मंगला पाटील आदी उपस्थित होते.
यावेळी आमदार लताताई सोनवणे म्हणाल्या की, जिल्हा परिषद विभागाकडून सार्वजनिक बांधकाम विभागाकडे वर्ग झालेले ८० किमी चे रस्ते यात धनवाडी ते कठोरा – ११ किमी, वर्डी ते मंगरूळ फाटा- १६ किमी, कुसूंबा – मोहिदा फाटा – अजंतीसिम – वढोदा – विटनेर – वाळकी – अनवर्दे – घाडवेल ३१ किमी, घाडवेल ते वाळकी रस्ता १२.५० किमी, गणपूर ते मराठे ते लासुर रस्ता १० किमी असे एकूण ८१ किमी चे रस्ते वर्ग करण्यात आले आहेत. तसेच मागील अर्थसंकल्पात २५ कोटी व आताच्या अर्थसंकल्पात २५ कोटी असे एकुण ५० कोटी रुपयांचा निधी ग्रामीण रस्त्यांसाठी मंजूर झाला आहे. सदर कामेही लवकर सुरू होणार आहेत. तालुक्यातील उनपदेव व मनुदेवी या पर्यटन स्थळांना प्रत्येकी ५ कोटी रुपये मंजूर झाले असून चांदसणी – कमळगांव येथील कालभैरव मंदिराच्या सभामंडपासाठी ५० लाख रुपयांचा निधी मिळाला असल्याची माहिती त्यांनी यावेळी दिली.
