टीम लोकप्रवाह, चोपडा दि. ३० मार्च – आशा स्वयंसेविका म्हणजेच आशा वर्कर्स या आरोग्य विभाग व सर्वसामान्य नागरिक यांच्यामधील महत्वाचा दुवा मानल्या जातात. आशा स्वयंसेविका व गटप्रवर्तक यांनी आरोग्य विभागात उल्लेखनीय आरोग्यसेवा दिल्याबद्दल त्यांचे कौतुक व्हावे त्याबरोबरच त्यांच्यातील सुप्त कलागुणांना वाव मिळावा याकरीता दि. ३० मार्च २०२३ रोजी शहरातील नगरपालिका नाट्यगृह येथे आरोग्य विभागाच्या वतीने “आशा दिवस” विविध उपक्रमांनी साजरा करण्यात आला. याप्रसंगी प्रमुख अतिथी म्हणून चोपडा विधानसभा क्षेत्राच्या आमदार लताताई सोनवणे, गटविकास अधिकारी बी. एस. कोसोदे व शिवसेना महिला आघाडी अध्यक्षा मंगला पाटील आदिंची उपस्थिती होती. कार्यक्रमाची सुरुवात आमदार लताताई सोनवणे यांच्या हस्ते दीप प्रज्वलन करून करण्यात आली.
कोविड-१९ सारख्या भीषण परिस्थितीमध्ये आपल्या जीवाची पर्वा न करता आशा स्वंयसेविकांनी घरोघरी जावून जनजागृतीचे व आरोग्यसेवा बजाविण्याची उल्लेखनीय कामगिरी केली, असे गौरवोद्गार यावेळी आमदार लताताई सोनवणे यांनी आपल्या भाषणातून काढले.
यावेळी सर्वोत्कृष्ट आशा स्वयंसेविका म्हणून छाया नितीन माळी अडावद, मीनाक्षी प्रवीणकुमार सोनवणे चहार्डी, सुरेखा दिलीप महाजन धानोरा, शीतल शरद पाटील गोरगांवले बु., उषाबाई जगन्नाथ सोनवणे हातेड बु., दिपाली सुनील ढिवरे लासुर, संगीता पंडित पाटील वैजापूर, गायत्री विलास जोशी चोपडा शहर व सर्वोत्कृष्ट गटप्रवर्तक म्हणून ललिता शिरसाठ, प्रा. आ. केंद्र, चहार्डी यांना मान्यवरांच्या हस्ते प्रशस्तीपत्र व भेटवस्तू देऊन गौरविण्यात आले. चोपडा तालुका आरोग्य विभागाअंतर्गत विविध प्राथमिक आरोग्य केंद्रात एकुण २४१ आशा स्वयंसेविका व १४ गटप्रवर्तक आपली सेवा बजावितात.
याप्रसंगी कार्यक्रमाचे प्रास्ताविक तालुका आरोग्य अधिकारी डॉ. प्रदीप लासुरकर यांनी केले. तसेच राष्ट्रीय क्षयरोग कार्यक्रमांतर्गत रांगोळी स्पर्धा, गीतगायन स्पर्धा व कवितावाचन स्पर्धा इत्यादी कार्यक्रम घेण्यात आल्या. आशांना त्यांचे दैनंदिन काम करतांना येणारे ताणतणाव दूर ठेवणेसाठी मानसोपचार समुपदेशक अजित बाविस्कर यांनी समुपदेशन सत्रात मार्गदर्शन केले. यावेळी वैद्यकीय अधिकारी डॉ. योगेंद्र पवार, डॉ. दिनेश निळे, डॉ. वसंत जाधव, डॉ. नकुल पाटील, डॉ. मयूर पाटील, डॉ. विवेक जयस्वाल उपस्थित होते. सदर कार्यक्रमाचे सुत्रसंचालन जितेंद्र महाजन यांनी तर आभारप्रदर्शन डॉ. योगेंद्र पवार यांनी केले.
कार्यक्रम यशस्वीतेसाठी जगदीश बाविस्कर, जितेंद्र मोरे, राजू पाटील, प्रमोद पाटील, दिलबरसिंग वळवी, कमलेश बडगुजर, किशोर सैंदाणे, राजु पवार, गजानन करंदीकर, चेतन धामोणे, निलेश सपकाळे, तालुका समूह संघटक सागर शिंपी, ललिता परदेशी, जयश्री तायडे व ज्योती सोनवणे आदिंनी परिश्रम घेतले.
