टिम लोकप्रवाह, चोपडा दि. १० जुलै – येथे नव्यानेच रुजू झालेले तहसिलदार भाऊसाहेब थोरात यांनी दि. 10 जुलै रोजी “शासन आपल्या दारी” योजनेंतर्गत चौगाव गावाला भेट दिली. महा राजस्व अभियानांतर्गत मौजे चौगाव येथे गट स्किम लागू नसलेल्या एकूण एकवीस ७/१२ उतारा संगणकीकरणाचे काम गेल्या पंचवीस वर्षापासून प्रलंबित होते. आज रोजी सदरील सर्व शेतकऱ्यांचे सातबारा संगणकीकृत करून त्यांना तहसिलदार भाऊसाहेब थोरात, नायब तहसिलदार सचिन बांबळे यांच्या हस्ते मोफत सातबारा वितरण करण्यात आले. यावेळी मंडळाधिकारी आर. जे. बेलदार, तलाठी भुषण पाटील व कोतवाल चंद्रभान कोळी यांची उपस्थिती होती. तहसिलदार यांनी शासनाच्या विविध योजनांची माहिती ग्रामस्थांना दिली.
सदर शेतकरी हे गेल्या पंचवीस वर्षापासून पिक विमा, पिक कर्ज, ठिबक सिंचन अनुदान योजना अशा तत्सम सर्व शासकीय योजनांपासुन वंचित होते. त्यांना आता हा लाभ घेता येणार आहे. यामध्ये रजान बारेला, कमलबाई सकाराम पाटिल, नानेश्वर बद्धू पारधी, संदिप हरी धनगर, रमणा बारकू पारधी, कमलबाई शामराव कोळी, ईश्वर रामदास पारधी, शांताराम पारधी, महेंद्र चैत्राम धनगर, कांतिलाल पाटिल, गणेश इश्वर धनगर, गोकूळ शिवाजी कोळी आदी शेतकऱ्यांचा यामध्ये समावेश आहे. चौगाव गडाविषयी विश्राम तेले यांनी तहसिलदारांशी यावेळी चर्चा केली.
यावेळी ग्राम पंचायत सदस्य शामकांत पाटील, मनोहर पाटिल, पिरण भिल, सुरेश धनगर, अरूण कोळी, बापुराव सकाराम, विशाल पाटिल आदिंसह इतर ग्रामस्थांची उपस्थिती होती.
