टिम लोकप्रवाह, चोपडा दि. ३० : तालुक्यातील चहार्डी ग्रामपंचायतीला पूर्णवेळ ग्रामसेवकाची नेमणूक तसेच दिव्यांगांना त्यांच्या हक्काचा निधी मिळावा यासाठी आपचे कार्यकर्ते व दिव्यांग बंधू यांचे तब्बल 20 दिवसांपासून गावातील महादेव मंदिरात साखळी उपोषण सुरु होते. या कालावधी मध्ये मुख्य कार्यकारी अधिकारी यांना दोन वेळा निवेदन देण्यात आले. याची दखल घेत येत्या दोन दिवसात नवीन ग्रामसेवक रूजू करण्याचे लेखी आश्वासन त्यांनी दिले आहे.
चोपडा तालुक्यातील नंबर २ ची लोकसंख्या असलेली चहार्डी ग्रामपंचायत कार्यालयाचे कामकाज पुर्णवेळ होत नाही, ग्रामसेवक सतत गैरहजर असतात, ग्रामसेवकाचा मनमानी कारभार सुरु असून नागरिकांना कोणत्याही नागरी सुविधा मिळत नाही. ज्यामध्ये उतारे व दाखले वेळेवर न मिळणे, गावातं स्वच्छता व साफसफाई न होणे, गटारी व सार्वजनीक शौचालयांची सफाई होत नसून मैला उघडयावर वाहून नदीत जातो त्यामुळे पाणी दुषीत होवून नागरिकांच्या आरोग्य व गावातील पशुधन यांचे आरोग्याचा प्रश्न निर्माण होणे तसेच गावातील कुपनलिकेच्या पाण्याचा रिपोर्टपण दुषीत आला असुनही कोणतीही कार्यवाही न करणे व दुषीत पाण्याचा पुरवठा होणे आदी बाबींचा समावेश आहे.
सदर साखळी उपोषणास प्रहार दिव्यांग क्रांती संस्था ( महाराष्ट्र राज्य ) ने आपला जाहीर पाठिंबा देत जो पर्यंत दिव्यांगांना त्यांचा हक्काचा निधी मिळणार नाही तो पर्यंत पाठपुरावा करू असे आश्वासन प्रहारचे जिल्हा अध्यक्ष बाळासाहेब पाटील यांनी सांगितले.
तसेच दिव्यांग बंधु-भगिनींना दिव्यांग निधी मिळाला नसून त्यापासुन ते वंचित आहेत. या सर्व सुविधांसाठी चहार्डी ग्रामपंचायतीला पुर्णवेळ व निवासी ग्रामसेवकाची नेमणूक व्हावी जेणेकरुन नागरिकांची कामे वेळेवर होतील. यासाठी आम आदमी पक्षाचे तालुका उपसंयोजक मुकुंदराव पाटील व गावातील दिव्यांग बंधू ९ ऑगस्ट क्रांती दिनापासून साखळी उपोषणास बसले होते. आज २० व्या दिवशी लेखी आश्वासन नंतर साखळी उपोषण सोडण्यात आले.
यावेळी प्रहारचे जिल्हा अध्यक्ष बाळासाहेब पाटील, सुरेश पाटील (रावेर), रविंद्र पाटील ( खडगाव ), प्रहार तालुकाध्यक्ष भगवान वैदू, आम आदमी पक्षाचे जिल्हाध्यक्ष मिलिंद चौधरी, योगेश हिवरकर, योगेश भोई, जिल्हा उप संयोजक विठ्ठल साळुंखे, शिक्षक आघाडी जिल्हाध्यक्ष आर. डी. पाटील, तालुका संयोजक समाधान बाविस्कर, शहर संयोजक सुधीर पाटील, सिताराम वसंत पाटील, दिपक भाईदास पाटील, प्रकाश रघुनाथ सोनवणे, गोविंद लालचंद कोळी, अनिल मधुकर महाजन, जेष्ठ नागरिक भगवान रतन वाणी यांसह दिव्यांग बांधव मोठ्या संख्येने उपस्थित होते.
