टिम लोकप्रवाह, चोपडा दि. २५ – तब्बल पंधरा हजार रुपयांची लाच घेतल्याप्रकरणी चोपडा ग्रामीण पोलिस स्टेशनचा सहायक फौजदार एसीबीच्या जाळ्यात अडकला आहे. शिवाजी ढगू बाविस्कर असे लाचखोर सहायक फौजदाराचे नाव आहे. या प्रकरणातील तक्रारदाराचा चुलत भाऊ व त्याचा मित्र यांना दिनांक 23 ऑगस्ट रोजी रात्री नऊ वाजेच्या सुमारास तीन पोलीसांनी लासूर ते सत्रासेन रस्तावर त्यांची मोटार सायकल अडवून थांबवले होते. तुमच्याजवळ गांजा आहे, असे सांगुन तुम्ही पोलीस स्टेशनला चला असे त्यांना सांगितले. व तुमच्याविरुद्ध गांजाची केस करायची करायची आहे. जर गांजाची केस व मोटार सायकल सोडवायची असेल तर आम्हाला प्रत्येकी 75 हजार रुपये द्यावे लागतील असे सांगण्यात आले होते.
तक्रारदाराच्या नातेवाईकांकडून पहाटे चार वाजेच्या सुमारास तीस हजार रुपये घेण्यात आले, मात्र मोटरसायकल ठेवून घेतली. मोटार सायकल सोडवायची असल्यास राहीलेले विस हजार रुपये आम्हास द्यावे लागतील असे त्यांना सांगण्यात आले. त्यानंतर दि. 24 ऑगस्ट रोजी तक्रारदाराकडे गांजाची केस न करण्यासह मोटार सायकल सोडवण्यासाठी विस हजार रुपयांची मागणी करण्यात आली. तडजोडीअंती पंधरा हजार रुपये पंचासमक्ष सहायक फौजदार शिवाजी बाविस्कर यांनी घेतले. त्याच वेळी एसीबी पथकाने कारवाई केली. याप्रकरणी चोपडा शहर पोलिस स्टेशनला गुन्हा दाखल करण्यात आला आहे.
सदर कारवाई लाचलुचपत प्रतिबंधक विभाग, जळगांवचे पोलीस उपअधीक्षक सुहास देशमुख यांच्या मार्गदर्शनाखाली पोलिस निरीक्षक अमोल वालझाडे, स.फौ. दिनेशसिंग पाटील, पोना. बाळु मराठे, पोकॉ. राकेश दुसाने आदिंनी केली. त्यांना पोलीस निरिक्षक एन. एन. जाधव, स.फौ. सुरेश पाटील, पोहेकाँ. रविंद्र घुगे, म.पो.हे.कॉ. शैला धनगर, पोना. किशोर महाजन, सुनिल वानखेडे, पोकॉ. प्रदिप पोळ, अमोल सुर्यवंशी, प्रणेश ठाकुर, सचिन चाटे आदिंचे सहकार्य होते.
