टिम लोकप्रवाह, देवळी (वर्धा) दि. ०२ – तालुक्यातील नागझरी येथे पंतप्रधान ग्राम सडक योजनेंतर्गत मंजुर सिमेंट रस्त्याचे बांधकाम निकृष्ट होत असल्याचे निदर्शनास आल्याने तेथील ग्रामपंचायत सदस्यांनी सदर काम बंद पाडले व निकृष्ट काम करणाऱ्या ठेकेदारावर कारवाई करण्याची मागणी केली.
याबाबत सविस्तर वृत्त असे की, तालुक्यातील नागझरी येथे पंतप्रधान ग्राम सडक योजनेंतर्गत सिमेंट रोड मंजुर करण्यात आला आहे. सदर रस्ता बांधकामाचे कंत्राट देवळी येथील कंत्राटदार कापसे यांना देण्यात आले आहे. रस्त्याचे बांधकाम कशा पद्धतीने होत आहे हे पाहण्याकरीता नागझरी ग्रामपंचायतीचे सदस्य अभिषेक जगताप यांनी पाहणी केली असता सदर रस्ता बांधकामामध्ये माती मिश्रीत रेतीचा वापर तसेच शासन नियमानुसार मिक्सर मशीनमध्ये 16 बॕग सिमेंटचा वापर करणे अनिवार्य असूनसुद्धा त्याठिकाणी फक्त सात बॅगा सिमेंटचा वापर करीत असल्याचे निदर्शनास येताच ग्रामपंचायत सदस्य जय जगताप यांनी ताबडतोब बांधकाम विभागाचे उपअभियंता यांना जागेवर बोलावून सदर रस्त्याचे बांधकाम बंद पाडले. व जोपर्यंत सदर रस्त्याचे काम उत्कृष्ट पद्धतीने होणार असल्याची हमी मिळणार नाही तोपर्यंत काम सुरु होवु देणार नसल्याचे सांगितले. तसेच निकृष्ट काम करणाऱ्या ठेकेदारावर कारवाई करण्याची मागणी केली.
