टिम लोकप्रवाह, चोपडा दि. 0७ : महाराष्ट्र राज्याच्या माजी शिक्षण मंत्री (स्व.) शरदचंद्रिका सुरेश पाटील यांनी सातपुडा पर्वत रांगामधील अतिशय दुर्गम भागात शिक्षणाची मुहूर्तमेढ रोवली. गोरगरिबांच्या दाराशी शिक्षण मिळावे, या उदात्त हेतूने शैक्षणिक संस्था उभ्या केल्यात. त्यांचे कार्य महान असून ज्या शैक्षणिक संस्थेत आपण शिक्षण घेतो, त्या शैक्षणिक संस्थेचे नाव उंचवा असे प्रतिपादन गटशिक्षणाधिकारी अविनाश पाटील यांनी केले. ते येथील कस्तुरबा माध्यमिक विद्यालयात गरीब व होतकरू विद्यार्थिनींना गणवेष व शैक्षणिक साहित्य वाटपाप्रसंगी बोलत होते. व्यासपीठावर पंचायत समितीचे तज्ज्ञ शिक्षक प्रशांत सोनवणे, मुख्याध्यापक एस. एल. पाटील, श्रीमती आर. सी. शिरसाळे होते.
कार्यक्रमाच्या सुरुवातीला कस्तुरबा महिला समाज संस्थेच्या संस्थापिका महाराष्ट्राच्या माजी शिक्षण मंत्री (स्व.) शरदचंद्रिका सुरेश पाटील यांच्या प्रतिमेचे पूजन करण्यात आले. प्रास्ताविक मुख्याध्यापक एस. एल. पाटील यांनी केले. यावेळी विद्यालयातील १७ विद्यार्थिनींना गणवेष व शैक्षणिक साहित्य गटशिक्षणाधिकारी अविनाश पाटील यांच्या हस्ते वाटप करण्यात आले. उपशिक्षक जयेश पाटील यांनीही माहिती विषद केली. तर सुत्रसंचालन डी. ए. महाले यांनी केले. सदर कार्यक्रम यशस्वीतेसाठी शाळेतील सर्व कर्मचारी वृंदांनी परिश्रम घेतले.
