लोकप्रवाह, चोपडा दि. २४ जून – येथील महात्मा गांधी शिक्षण मंडळ संचलित ऑक्सफर्ड इंग्लिश मीडियम स्कूल चोपडा या शाळेतील इयत्ता पाचवी ते दहावीच्या विद्यार्थ्यांसाठी अनोखी सहल आयोजित करण्यात आली. स्वातंत्र्याच्या अमृत महोत्सवाच्या अनुषंगाने व ८ व्या आंतरराष्ट्रीय योग दिनाचे औचित्य साधून महाराष्ट्रातील औरंगाबाद जिल्ह्यातील अजिंठा लेणी येथे भेट देण्यात आली. या सहलीमध्ये १३ शिक्षक आणि ११५ विद्यार्थी सहभागी झाले होते.
आंतरराष्ट्रीय योग दिनानिमित्त अजिंठा लेणीच्या परिसरामध्ये सर्व विद्यार्थ्यांनी शिक्षकांसमवेत प्राणायाम व योगासनांची प्रात्याक्षिके केली. वास्तुकला, शिल्पकला व चित्रकला अशा तीन कलांचा त्रिवेणी संगम या अजिंठा लेणीमध्ये पहावयास मिळतो. सांस्कृतिक वारसा प्राप्त असलेल्या या जागतिक किर्तीच्या लेण्यांविषयी विद्यार्थ्यांनी अधिक माहिती जाणून घेतली. संपूर्ण लेणी हे स्थापत्य आणि कोरीव शिल्पाचे एकत्रित उदाहरण आहे. प्रवेशद्वार आतील खांब आणि मूर्ती हे शिल्पकलेचे उत्तम नमुने आहेत. भिंती आणि छतावरील केलेले चित्रकाम पाहून विद्यार्थी मंत्रमुग्ध होऊन गेले. मानवी पिढ्यांच्या हितासाठी आपल्या भारताच्या सांस्कृतिक वारसाचे जतन होणे आवश्यक आहे. चित्र आणि शिल्प यांचा अनमोल ठेवा असलेल्या अजिंठा लेण्यातील प्रसंगचित्र, व्यक्तीचित्र व निसर्गचित्र या तीन प्रकारच्या चित्रांविषयी विद्यार्थ्यांना अधिक माहिती प्रदान करण्यात आली. हिनयान पंथीय आणि महायान पंथीय या लेण्यांविषयीचा इतिहास विद्यार्थ्यांना यावेळी समजावून सांगण्यात आला.
याप्रसंगी क्रिडा शिक्षक पुजा चौधरी व प्रविण पाटील यांनी विद्यार्थ्यांना योगासनांची प्रात्याक्षिके करविण्याबाबत मार्गदर्शन केले. सदर उपक्रम यशस्वीतेसाठी मुख्याध्यापिका ममता कपिल न्याती यांच्या मार्गदर्शनाखाली सर्व शिक्षक व शिक्षकेतर कर्मचाऱ्यांनी परिश्रम घेतले.
