लोकप्रवाह, चाळीसगांव दि. २९ जून – येथील शहर पोलीस स्टेशनमध्ये कार्यरत सहाय्यक फौजदार अनिल रामचंद्र अहिरे व पोलीस नाईक शैलेष आत्माराम पाटील या दोघांनी लवकर चार्जशीट पाठवून गुन्ह्यात मदत करु असे सांगत तक्रारदाराला लाचेची मागणी केली व ती स्विकारतांना लाचलुचपत प्रतिबंधक विभागाकडून रंगेहाथ अटक करण्यात आली.
याबाबत सविस्तर वृत्त असे की, तक्रारदार यांच्या मुलीने चाळीसगांव शहर पोलीस स्टेशन येथे सासरच्या मंडळीविरुद्ध गु. र. नं. 0113 / 2022 भादवि कलम ४९८ अ व इतर कलमान्वये दि.19/03/3022 रोजी गुन्हा दाखल केला आहे. सदर गुन्ह्याच्या कागदपत्रांमध्ये मदत करू असे सांगून व चार्जशीट लवकरात लवकर पाठवुन गुन्ह्यात मदत करण्याच्या मोबदल्यात तक्रारदार यांचेकडे सहा. फौजदार अनिल रामचंद्र अहिरे, वय-५२ रा.वैष्णवी पार्क, चाळीसगांव यांनी पंचासमक्ष 4,000/- रुपये लाचेची मागणी केली व पोलीस नाईक शैलेष आत्माराम पाटील, वय-३८ रा. चाळीसगांव यांनी त्यास प्रोत्साहन दिले व सदर लाचेची रक्कम दोन्ही पोलीस कर्मचारी हजर असतांना दि. २८ जून रोजी सहा. फौजदार अनिल रामचंद्र अहिरे यांनी स्वतः चाळीसगाव शहरातील सिग्नल पाईंटजवळील एका चहाच्या टपरीवर पंचासमक्ष स्विकारताच त्यांना लाचलुचपत प्रतिबंधक विभागाकडून रंगेहाथ अटक करण्यात आली.
सदर कारवाई ला.प्र.वि, नाशिक परिक्षेत्र पोलीस अधीक्षक सुनील कडासने, अप्पर पोलीस अधीक्षक एन. एस. न्याहाळदे, वाचक पोलीस उपअधीक्षक सतिश भामरे यांच्या मार्गदर्शनाखाली व लाचलुचपत प्रतिबंधक विभाग, जळगांव चे पोलीस उपअधीक्षक शशिकांत एस.पाटील यांच्या नेतृत्वाखाली पोलीस निरिक्षक संजोग बच्छाव, पोलीस निरिक्षक एन.एन.जाधव, स.फौ.दिनेशसिंग पाटील, सुरेश पाटील, पो.हे.कॉ.अशोक अहीरे, पो.हे.कॉ.सुनिल पाटील, पो.हे.कॉ.रविंद्र घुगे, म.पो.हे.कॉ. शैला धनगर, पो.ना.मनोज जोशी, पो.ना.जनार्दन चौधरी, पो.ना.सुनिल शिरसाठ, पो.कॉ.प्रविण पाटील, पो.कॉ.महेश सोमवंशी, पो.कॉ.नासिर देशमुख, पो.कॉ.ईश्वर धनगर व पो.कॉ.प्रदिप पोळ आदिंनी केली.
