टिम लोकप्रवाह, चोपडा दि. 01 जुलै :– हरीत क्रांतीचे प्रणेते माजी मुख्यमंत्री (कै.)वसंतराव नाईक यांची जयंती ” दिनी १ जुलै सकाळी ८ वाजता कृषी उत्पन्न बाजार समिती आवारात “कृषीदिन साजरा करण्यात आला.
शेतकऱ्यांच्या कष्टाचा आणि समृद्धीचा सन्मान करण्यासाठी तसंच शेतकरी समुदायाच्या अखंड परिश्रमाला वाहिलेल्या शेतकऱ्यांचा हा सन्मान दिवस
‘कृषी दिना’च्या निमित्ताने येथील कृषी उत्पन्न बाजार समितीच्या आवारात प्रथम (कै.)वसंतराव नाईक यांच्या प्रतिमेचे पूजन करून शहरातून कृषी दिंडी वाजत गाजत काढण्यात आली. या दिंडीत शेतकरी, कृषी तज्ज्ञ, विद्यार्थी आणि स्थानिक नागरिकांनी उत्साहात सहभाग घेतला
“शेती ही आपली जीवनरेषा” या संदेशासह, शेतसाहित्य व नैसर्गिक शेतीचे मॉडेल्स घेऊन दिंडी निघाली. चोपडा कृषी उत्पन्न बाजार समिती मधून सकाळी साडेआठ वाजता निघालेल्या या कृषी दिंडीला तालुक्यातील शेतकऱ्यांनी सहभाग घेऊन मोठा उत्स्फूर्त प्रतिसाद दाखवला. पेरणीची पांभर, औत, बैलगाडी जोडी, विविध कृषी अवजारे, फवारणी पंप आदी साहित्य तालुक्यातील शेतकऱ्यांनी सजवून आणले होते. कस्तुरबा विद्यालयातील विद्यार्थ्यांनी शेतकरी गीत सादर केले. शेतकऱ्यांनी आपापल्या पारंपरिक पोषाखात सहभाग घेऊन कृषी संस्कृतीचे दर्शन घडवले. जय जवान जय किसान चा नारा देत दिंडी काढण्यात आली.
यावेळी महाराष्ट्र राज्याचे माजी विधानसभा अध्यक्ष अरुणभाई गुजराथी, उद्योजक वसंतभाई गुजराथी, डॉ.रवींद्र निकम, आडगाव येथील शेतकरी अंबादास पाटील, कृषी उत्पन्न बाजार समितीचे माजी सभापती ऍड. घनश्याम पाटील, संचालक नंदकिशोर पाटील, शेतकरी नेते एस बी पाटील, बाजार समितीचे सर्व संचालक, जिल्हा कृषी अधिकारी तडवी, तालुका कृषी अधिकारी दीपक साळुंखे, पाणी आडवा पाणी जिरवा या योजनेची यशस्वी अंमलबजावणी करणारे श्रीराम तेले, कवी रमेश पाटील, आडगाव चे माजी सरपंच रावसाहेब पाटील, हुकुमचंद पाटील, प्रकाश पाटील (बिडगाव) आदी मान्यवर यावेळी उपस्थित होते.
