टिम लोकप्रवाह, चोपडा दि. 22 : येथील विवेकानंद इंग्लिश मीडियम स्कूलमध्ये इयत्ता दहावीतील गुणवंत विद्यार्थ्यांचा तसेच त्यांच्या पालकांचा गौरव करण्यासाठी भव्य सन्मान सोहळ्याचे आयोजन करण्यात आले. विद्यार्थ्यांच्या यशामागील सामूहिक प्रयत्नांचा गौरव करण्याचा हा उपक्रम विशेष ठरला.
कार्यक्रमास प्रमुख अतिथी म्हणून अध्यक्ष डॉ. विकास हरताळकर, सचिव ॲड. रविंद्र जैन, संयुक्त सचिव डॉ. विनीत हरताळकर तसेच विवेकानंद माध्यमिक विद्यालयाचे मुख्याध्यापक नरेंद्र भावे उपस्थित होते. कार्यक्रमाचे आयोजन प्राचार्या सौ. भारती पंजाबी यांच्या मार्गदर्शनाखाली तर उपप्राचार्या सौ. गौरी शुक्ल यांच्या उपस्थितीत पार पडले.
या प्रसंगी गुणवंत विद्यार्थ्यांसह त्यांच्या पालकांचाही सन्मान चिन्ह देऊन गौरव करण्यात आला. विद्यार्थ्यांच्या सर्वांगीण यशासाठी विद्यार्थी, पालक आणि शाळा (व्यवस्थापन व शिक्षक) या त्रिसूत्रीचे महत्त्व अधोरेखित करण्यात आले.
🏆 गुणवंत विद्यार्थ्यांची नावे पुढीलप्रमाणे :
मोक्षदा पाटील – 94.60%
वेद चित्रोड – 94.60%
मोहित महाजन – 93.20%
सृष्टी पाटील – 92.40%
सुशील महाजन – 90.80%
प्रथमेश पाटील – 90.00%
प्राचार्या सौ. भारती पंजाबी यांनी आपल्या प्रेरणादायी भाषणात विद्यार्थ्यांना मार्गदर्शन करताना सांगितले की, “यशाला कोणताही शॉर्टकट नसतो. स्वप्न, कठोर परिश्रम, सातत्यपूर्ण कृती आणि समाजसेवेची भावना यांमुळेच खरे यश मिळते.”
यावेळी गुणवंत विद्यार्थ्यांनीही आपल्या यशाचा प्रवास सांगत इयत्ता नववी व दहावीच्या विद्यार्थ्यांना अभ्यासाचे नियोजन, शिस्त, वेळेचे व्यवस्थापन तसेच टाळावयाच्या चुका याबाबत मोलाचे मार्गदर्शन केले. हा सन्मान सोहळा विद्यार्थ्यांसाठी प्रेरणादायी ठरला असून उपस्थितांना उच्च ध्येय गाठण्यासाठी प्रेरणा देणारा ठरला.
