टिम लोकप्रवाह, चोपडा दि. 25 : चोपडा येथे आयोजित करण्यात आलेला ‘एन-मुक्ता’चा तालुका मेळावा उत्साहपूर्ण व यशस्वी वातावरणात संपन्न झाला. या मेळाव्यात दादासाहेब डॉ. सुरेश पाटील कला, वाणिज्य व विज्ञान महाविद्यालय, पंकज कला, वाणिज्य व विज्ञान महाविद्यालय तसेच समाजकार्य महाविद्यालयातील सदस्यांनी मोठ्या संख्येने सहभागी होत कार्यक्रमाला उत्स्फूर्त प्रतिसाद दिला.
मेळाव्याची सुरुवात नितीन बारी (अध्यक्ष, एन-मुक्ता जळगाव जिल्हा) यांच्या हस्ते दीपप्रज्वलनाने झाली. प्रमुख अतिथी म्हणून कांचन महाजन व पवन पाटील उपस्थित होते. कार्यक्रमाचे सूत्रसंचालन प्रा. डॉ. एस. के. पाटील यांनी केले. कार्यक्रमाच्या प्रारंभी प्रा. डॉ. चंद्रकांत देवरे यांनी संघटनेचे गीत सादर केले, तर प्रास्ताविक प्रा. डॉ. लालचंद पटले यांनी मांडले. व्यासपीठावर प्रा. डॉ. रमाकांत बागुल, प्रा. डॉ. हरीष चौधरी व प्रा. डॉ. क्रांती वाघ उपस्थित होते.
या मेळाव्यात शैक्षणिक क्षेत्रात उल्लेखनीय कार्य करणाऱ्या व पदोन्नती प्राप्त प्राध्यापकांचा मान्यवरांच्या हस्ते गौरव करण्यात आला. यावेळी उपस्थित सदस्यांनी आपल्या विविध समस्या व मागण्या मांडल्या. त्यावर नितीन बारी यांनी मार्गदर्शन करत, समस्या सोडवण्यासाठी सर्व स्तरावर प्रयत्न केले जातील, असे आश्वासन दिले.
कार्यक्रमाच्या शेवटी प्रा. डॉ. अनंत देशमुख यांनी आभार प्रदर्शन केले. मेळावा यशस्वी होण्यासाठी प्रा. डॉ. कुणाल गायकवाड, प्रा. डॉ. किशोर पाठक तसेच चोपडा समाजकार्य महाविद्यालयातील प्राध्यापकांनी विशेष परिश्रम घेतले. स्नेहभोजनानंतर मेळाव्याची आनंददायी वातावरणात सांगता झाली.
