बेघर व गरजू व्यक्तींच्या सेवेसाठी उल्लेखनीय कार्य नरेंद्र पाटील यांना “महानायक श्री. वसंतरावजी नाईक राष्ट्रीय प्रेरणा पुरस्कार २०२५” जाहीर

टीम लोकप्रवाह, चोपडा – जळगाव जिल्ह्यातील चोपडा तालुक्यात सामाजिक क्षेत्रात उल्लेखनीय कार्य करणारे तसेच “अपनाही घर प्रतिष्ठान संचलित मानव सेवा तीर्थ, चोपडा” चे अध्यक्ष श्री. नरेंद्र  पाटील यांची “महानायक श्री. वसंतरावजी नाईक राष्ट्रीय प्रेरणा पुरस्कार २०२५” साठी निवड करण्यात आली आहे. बेघर, निराधार व गरजू व्यक्तींसाठी त्यांनी केलेल्या मानवसेवेची दखल घेत हा राष्ट्रीय स्तरावरील प्रतिष्ठेचा पुरस्कार जाहीर करण्यात आला आहे.

महानायक श्री. वसंतराव नाईक विचार मंच देवणी, जि. लातूर तसेच एल.बी.एस मिशन, निलंगा यांच्या संयुक्त विद्यमाने या पुरस्काराचे आयोजन करण्यात आले आहे. आयोजकांनी जाहीर केलेल्या माहितीनुसार, नरेंद्र रावण पाटील यांनी केलेल्या समाजसेवेने मानवतेची नवी मिसाल निर्माण केली असून, त्यांच्या कार्याचा गौरव म्हणून हा सन्मान प्रदान करण्यात येत आहे.

हा पुरस्कार वितरण सोहळा दिनांक १ जुलै २०२६ रोजी सकाळी ११ वाजता माने फंक्शन हॉल, बँक कॉलनी रोड, निलंगा, जि. लातूर येथे संपन्न होणार आहे. या ठिकाणी मान्यवरांच्या उपस्थितीत नरेंद्र रावण पाटील यांचा विशेष सत्कार करण्यात येणार आहे.

समाजातील बेघर आणि निराधार व्यक्तींना आधार देण्यासाठी नरेंद्र रावण पाटील यांनी अनेक वर्षांपासून सातत्याने कार्य केले आहे. त्यांच्या या कार्यामुळे सामाजिक क्षेत्रातून त्यांच्यावर अभिनंदनाचा वर्षाव होत असून, चोपडा तालुका तसेच जळगाव जिल्ह्यासाठी ही अभिमानाची बाब मानली जात आहे.