चोपडा (प्रतिनिधी) : “पोलीस दल हे केवळ कायदा व सुव्यवस्था राखणारे नसून संकटसमयी आपल्या सहकाऱ्यांसाठी कुटुंबाप्रमाणे उभे राहणारे कुटुंब आहे,” याची प्रचिती चोपडा शहर पोलीस स्टेशनमध्ये नुकतीच आली.
चोपडा शहर पोलीस स्टेशनमध्ये अनेक वर्षांपासून प्रामाणिकपणे व निष्ठेने सेवा बजावत असलेले होमगार्ड अधिकारी रवींद्र पाटील यांना चेहऱ्याच्या उजव्या बाजूस कॅन्सरचे निदान झाल्याची माहिती मिळताच पोलीस निरीक्षक पवन देसले यांनी तत्काळ त्यांच्या निवासस्थानी भेट देऊन प्रकृतीची विचारपूस केली. त्यांच्या उपचारासाठी आर्थिक मदतीची गरज ओळखून पोलीस अधिकारी, पोलीस अंमलदार आणि सहकाऱ्यांना सोबत घेत ₹२५,००० ची आर्थिक मदत त्यांच्या कुटुंबीयांकडे सुपूर्द केली.
रवींद्र पाटील यांनी गणेशोत्सव बंदोबस्त, विविध धार्मिक मिरवणुका तसेच कायदा व सुव्यवस्था राखण्याच्या अनेक महत्त्वाच्या जबाबदाऱ्या अत्यंत प्रामाणिकपणे पार पाडल्या आहेत. आज त्यांच्यावर आलेल्या या कठीण प्रसंगी संपूर्ण चोपडा शहर पोलीस परिवार त्यांच्या पाठीशी खंबीरपणे उभा राहिला.
“गणवेशातील माणुसकीच सर्वात मोठी ताकद असते; संकटात सहकाऱ्याचा हात धरून उभे राहणे, हीच खरी पोलीस दलाची ओळख आहे.”
यावेळी उपस्थित सर्वांनी रवींद्र पाटील यांना धीर देत, “आर्थिक मदत ही केवळ रक्कम नसून, संपूर्ण पोलीस कुटुंब तुमच्या पाठीशी उभे आहे, हा विश्वास आहे,” अशा भावना व्यक्त केल्या. या उपक्रमातून पोलीस दलातील एकोप्याची भावना, सामाजिक बांधिलकी आणि माणुसकीचा जिवंत आदर्श समाजासमोर आला. याप्रसंगी पोलीस अधिकारी, पोलीस अंमलदार तसेच सहकारी उपस्थित होते. सर्वांनी रवींद्र पाटील यांच्या लवकरात लवकर पूर्णपणे बरे होण्यासाठी शुभेच्छा व्यक्त केल्या.
