टीम लोकप्रवाह, चोपडा, दि. १५ जुलै : अपनाही घर प्रतिष्ठान या बेवारस व निराधार मनोरुग्णांच्या सेवेसाठी कार्यरत असलेल्या संस्थेच्या मानव सेवा केंद्र या नूतन इमारतीच्या बांधकामाचे भूमिपूजन आज चोपडा तालुक्याचे तहसीलदार भाऊसाहेब थोरात यांच्या शुभहस्ते मोठ्या उत्साहात व धार्मिक विधीवत वातावरणात संपन्न झाले. भूमिपूजन प्रसंगी तहसीलदार भाऊसाहेब थोरात यांनी श्रीफळ वाढवून तसेच टिकाव मारून नूतन इमारतीच्या बांधकामाचा शुभारंभ केला.
यावेळी तहसीलदार भाऊसाहेब थोरात यांनी संस्थेच्या सुरू असलेल्या निस्वार्थ सेवाकार्याचे कौतुक करत, बेवारस व निराधार मनोरुग्णांना सुरक्षित निवारा, उपचार आणि सन्मानाचे जीवन देण्यासाठी उभारली जाणारी ही इमारत समाजासाठी प्रेरणादायी ठरेल, असा विश्वास व्यक्त केला.
संस्थेच्या या नूतन प्रकल्पामुळे बेवारस व निराधार मनोरुग्णांच्या पुनर्वसनासाठी अधिक सक्षम व सुसज्ज सुविधा उपलब्ध होणार असून, समाजातील दानशूर व्यक्ती, सामाजिक संस्था आणि नागरिकांनी या सेवाकार्यात सक्रिय सहकार्य करावे, असे आवाहन यावेळी करण्यात आले.
याप्रसंगी वेले आखातवाडे ग्रामपंचायतीचे सरपंच, उपसरपंच व सर्व ग्रामपंचायत सदस्य आदींसह शामसिंग परदेशी, मंडळधिकारी मनोज साळुंखे, भूषण पाटील, माजी उपसरपंच विनोद पाटील, माजी नगरसेवक प्रकाश पाटील, मनोज चित्रकथी, अपनाही घर या सेवाभावी संस्थेचे अध्यक्ष नरेंद्र पाटील, संचालक अजय जोहरी, विजय पाटील, दिनेश पवार, पत्रकार बांधव तसेच संस्थेचे समन्वयक संदीप ओली आदी मान्यवर उपस्थित होते.
कार्यक्रमाचे नियोजन अत्यंत शिस्तबद्ध पद्धतीने करण्यात आले असून संपूर्ण परिसरात सेवाभाव, सामाजिक बांधिलकी आणि आनंदाचे वातावरण अनुभवायला मिळाले. उपस्थितांनी नूतन इमारतीच्या उभारणीसाठी शुभेच्छा देत संस्थेच्या कार्याला सर्वतोपरी सहकार्य करण्याचा संकल्प व्यक्त केला.
