चोपडा : श्री संत शिरोमणी सावता महाराज यांच्या संजीवन समाधी सोहळ्यानिमित्त श्री फुलमाळी समाज सुधारणा समस्त पंचमंडळ व सर्व समाज बांधवांच्या वतीने चोपडा येथे दि. ५ ते ११ ऑगस्टदरम्यान विविध धार्मिक व सामाजिक कार्यक्रमांचे आयोजन करण्यात आले आहे. माळी समाज मंगल कार्यालय येथे होणाऱ्या या सप्ताहामुळे शहरात भक्तीमय वातावरण निर्माण होणार आहे.
सप्ताहाच्या काळात दररोज काकड आरती, हरिपाठ तसेच विविध नामवंत कीर्तनकारांच्या कीर्तनाचे आयोजन करण्यात आले आहे. दि. ५ ऑगस्ट रोजी ह.भ.प. सुनील महाराज जामनेर, ६ ऑगस्ट रोजी ह.भ.प. शुभम महाराज मंदाने (शहादा), ७ ऑगस्ट रोजी ह.भ.प. उमेश महाराज दहिवद, ८ ऑगस्ट रोजी ह.भ.प. श्रीकांत महाराज खडके, ९ ऑगस्ट रोजी ह.भ.प. गजानन महाराज सोनटक्के (पारोळा), १० ऑगस्ट रोजी ह.भ.प. भानुदास महाराज (भुसावळ) आणि ११ ऑगस्ट रोजी ह.भ.प. भावेश महाराज (विटनेर) यांच्या कीर्तनाचा भाविकांना लाभ मिळणार आहे.
गुणवंत विद्यार्थ्यांचा सत्कार
दि. ८ ऑगस्ट रोजी सायंकाळी ६ वाजता माळी समाज मंगल कार्यालय येथे माळी समाजातील गुणवंत विद्यार्थ्यांचा विशेष सत्कार सोहळा आयोजित करण्यात आला आहे. समाजातील गुणवंत विद्यार्थ्यांना प्रोत्साहन देण्याच्या उद्देशाने हा कार्यक्रम होणार आहे.
हजारो भाविकांसाठी महाप्रसाद व पालखी मिरवणूक
दि. ११ ऑगस्ट रोजी पंचक्रोशीतील तसेच सर्व समाज बांधवांसाठी भव्य महाप्रसादाचे आयोजन करण्यात आले असून, सुमारे ७ ते ८ हजार भाविक महाप्रसादाचा लाभ घेणार आहेत. त्यानंतर सायंकाळी शहरातील विविध भागातून संत सावता महाराजांच्या पालखीची भव्य मिरवणूक काढण्यात येणार आहे.
या संपूर्ण धार्मिक सोहळ्याचा पंचक्रोशीतील सर्व भाविक भक्तांनी मोठ्या संख्येने लाभ घ्यावा, कीर्तन-प्रवचनाचे श्रवण करून संत सावता महाराजांच्या विचारांचा संदेश आत्मसात करावा तसेच महाप्रसादाचा लाभ घ्यावा, असे आवाहन श्री फुलमाळी समाज सुधारणा समस्त पंचमंडळ व सर्व समाज बांधवांच्या वतीने करण्यात आले आहे.
