टिम लोकप्रवाह, चोपडा : जळगाव जिल्हा सरकारी नोकरांची सहकारी पतसंस्था अर्थात ग.स. सोसायटीचे शाखाधिकारी जगन्नाथ बाविस्कर (गोरगावले बु.) यांनी तब्बल ३६ वर्षे ८ महिने १४ दिवसांची प्रदीर्घ सेवा पूर्ण करून ३१ जुलै २०२६ रोजी सेवानिवृत्ती स्वीकारली. त्यांच्या प्रदीर्घ आणि उल्लेखनीय सेवेला गौरवपूर्ण निरोप देण्यासाठी चोपडा ग.स. विभागाच्या वतीने त्यांचा सपत्नीक सत्कार करण्यात आला. कार्यक्रमाच्या अध्यक्षस्थानी ग.स. सोसायटीचे माजी अध्यक्ष सुनील सूर्यवंशी होते. प्रमुख पाहुणे म्हणून विद्यमान संचालक योगेश सनेर, मंगेश भोईटे, एकनाथ पाटील तसेच माजी विभागीय अधिकारी किरण पाटील उपस्थित होते. कार्यक्रमाचे प्रास्ताविक माजी विभागीय अधिकारी अशोक पाटील यांनी केले.
यावेळी मान्यवरांनी आपल्या मनोगतात जगन्नाथ बाविस्कर यांच्या प्रदीर्घ सेवाकाळातील प्रामाणिकपणा, कर्तव्यनिष्ठा, कार्यकुशलता आणि सर्वसमावेशक कार्यपद्धतीचे कौतुक केले. संस्थेच्या कामकाजात त्यांनी दिलेले योगदान कायम स्मरणात राहील, असे गौरवोद्गार यावेळी व्यक्त करण्यात आले.
थकबाकी वसुलीसाठी विशेष योगदान
शाखाधिकारी म्हणून कार्यरत असताना थकबाकीदार सभासदांकडील सव्वा कोटी रुपयांपेक्षा अधिक थकीत रक्कम वसुलीसाठी जगन्नाथ बाविस्कर यांनी विशेष प्रयत्न केले. त्यांच्या या योगदानाचा विशेष उल्लेख यावेळी करण्यात आला.
सत्काराला उत्तर देताना जगन्नाथ बाविस्कर यांनी सर्वप्रथम सहकारमहर्षी स्व. बी. बी. आबा पाटील तसेच मायबाप ग.स. संस्थेचे ऋण व्यक्त केले. संस्थेच्या वाटचालीत योगदान देणाऱ्या दिवंगत नेतेमंडळी व पदाधिकाऱ्यांचे स्मरण करून त्यांनी विद्यमान नेतेमंडळी, पदाधिकारी व कार्यकारी मंडळाचे आभार मानले. भडगाव, अमळनेर, यावल, एरंडोल आणि चोपडा येथे सेवा बजावत असताना त्या-त्या ठिकाणचे सभासद, अधिकारी व कर्मचारी वृंद यांनी दिलेल्या सहकार्याबद्दलही त्यांनी कृतज्ञता व्यक्त केली.
कार्यक्रमास चोसाका संचालक अनिल पाटील, डॉ. मोहन पाटील, देविदास पाटील, प्रेमनाथ बाविस्कर, श्रीमती जावित्रीबाई बाविस्कर, सौ. आशाबाई बाविस्कर, वैभवराज बाविस्कर, सौ. दिपाली बाविस्कर, तसेच चोपडा ग.स.चे विभागीय अधिकारी दिलीप सपकाळे, शाखाधिकारी शितल मोरे, स्मिता मोरे, शरद पाटील, प्रविण सत्तेसा, चेतन सोनवणे यांच्यासह सर्व उपशाखाधिकारी, रोखपाल, लिपिक व कर्मचारी वृंद उपस्थित होते. कार्यक्रमाच्या यशस्वीतेसाठी ग.स. विभागातील सर्व कर्मचाऱ्यांनी परिश्रम घेतले. सूत्रसंचालन व आभार प्रदर्शन रोखपाल उज्वल शिंदे यांनी केले.
