टिम लोकप्रवाह, चोपडा दि. १३ : तालुक्यातील आखतवाडे विविध कार्यकारी सेवा सहकारी सोसायटी या संस्थेने ३० जून २०२६ अखेर वितरित करण्यात आलेल्या पीक कर्जाची १०० टक्के परतफेड करून उल्लेखनीय कामगिरी केली. संस्थेच्या या उत्कृष्ट आर्थिक शिस्तीची व सभासदांच्या कर्ज परतफेडीतील योगदानाची दखल घेत संस्थेचा विशेष गौरव करण्यात आला.
यावेळी जळगाव जिल्हा मध्यवर्ती सहकारी बँकेच्या संचालक शैलजाताई निकम तसेच महाराष्ट्र स्टेट मार्केटिंग फेडरेशनचे अध्यक्ष रोहित निकम यांच्या हस्ते आखतवाडे विविध कार्यकारी सेवा सहकारी सोसायटीचे चेअरमन राजेंद्र गंगाधर पाटील व सचिव साहेबराव पाटील यांचा सत्कार करण्यात आला.
पीक कर्जाची वेळेत व शंभर टक्के परतफेड होणे ही संस्थेच्या आर्थिक शिस्तीची, सभासदांच्या विश्वासाची आणि संस्थेच्या प्रभावी व्यवस्थापनाची पावती मानली जाते. आखतवाडे संस्थेने ही उल्लेखनीय कामगिरी करून सहकार क्षेत्रात आदर्श निर्माण केला आहे. संस्थेच्या या कामगिरीमुळे सभासदांमध्ये आर्थिक शिस्त, वेळेवर कर्जफेड आणि सहकारी संस्थांवरील विश्वास अधिक दृढ होण्यास मदत होणार आहे.
याप्रसंगी मान्यवरांनी संस्थेच्या कामकाजाचे कौतुक करत चेअरमन, सचिव, संचालक मंडळ तसेच संस्थेच्या सर्व सभासदांचे अभिनंदन केले. पीक कर्जाची नियमित व वेळेवर परतफेड करणाऱ्या सभासदांमुळे संस्थेची आर्थिक पत मजबूत होण्यास हातभार लागतो, असेही यावेळी नमूद करण्यात आले.
कार्यक्रमास तालुक्यातील विविध कार्यकारी सेवा सहकारी संस्थांचे चेअरमन, सचिव, संचालक मंडळाचे पदाधिकारी, बँकेचे अधिकारी व कर्मचारी तसेच सहकार क्षेत्रातील मान्यवर मोठ्या संख्येने उपस्थित होते.
आखतवाडे विविध कार्यकारी सेवा सहकारी सोसायटीने केलेली ही १०० टक्के पीककर्ज परतफेडीची कामगिरी निश्चितच सहकार क्षेत्रातील इतर संस्थांसाठी प्रेरणादायी व अनुकरणीय ठरणारी आहे.
