चोपडा, दि. १५ (प्रतिनिधी) : स्वातंत्र्यदिनाचे औचित्य साधून श्री अखिल भारतीय समरथ जैन श्रावक संघ, मालेगाव यांच्या वतीने चोपडा येथील कमला नेहरू मागासवर्गीय मुलींच्या वसतिगृहातील गरजू आदिवासी विद्यार्थीनींना वस्त्रदान करण्यात आले. संघाचे महामंत्री तथा दातृत्वशील व्यक्तिमत्त्व श्री. प्रदीप मिलापचंद बरडिया यांच्या हस्ते हा सामाजिक उपक्रम उत्साहपूर्ण वातावरणात पार पडला.
स्वातंत्र्य मिळून अनेक दशके उलटली असली, तरी समाजातील काही घटक आजही अन्न, वस्त्र आणि निवाऱ्यासारख्या मूलभूत गरजांसाठी संघर्ष करत आहेत. विशेषतः आदिवासी तसेच आर्थिकदृष्ट्या दुर्बल कुटुंबांतील विद्यार्थी-विद्यार्थिनींना शिक्षण घेताना विविध अडचणींचा सामना करावा लागतो. अशा परिस्थितीत शिक्षणाच्या प्रवाहात असलेल्या गरजू विद्यार्थीनींच्या मूलभूत गरजा लक्षात घेऊन त्यांना आवश्यक मदत उपलब्ध करून देणे ही समाजाची सामूहिक जबाबदारी असल्याचे यावेळी उपस्थितांनी नमूद केले.
यावेळी बोलताना महामंत्री प्रदीपभाई बरडिया म्हणाले, “स्वातंत्र्यदिनाच्या दिवशी केवळ तिरंग्याला सलाम करून उत्सव साजरा करण्यापेक्षा, शिक्षण घेऊन स्वतःच्या पायावर उभे राहण्याचा प्रयत्न करणाऱ्या गरजू विद्यार्थ्यांच्या पाठीशी उभे राहणे अधिक महत्त्वाचे आहे. समाजातील खऱ्या गरजूंना योग्य वेळी मदतीचा हात मिळाला, तर त्यांच्या जीवनात सकारात्मक बदल घडू शकतो. गरजू विद्यार्थ्यांना शिक्षणासोबतच आवश्यक साधनसामग्री आणि सुविधा उपलब्ध करून देऊन त्यांना पुढे आणणे ही आजची गरज आहे.”
“मानव सेवा हीच ईश्वर सेवा” या भावनेतून समाजातील सक्षम व्यक्ती, संस्था आणि दानशूर नागरिकांनी आपल्या परीने गरजूंसाठी योगदान देण्याची भावना जोपासली पाहिजे. अशा सामाजिक उपक्रमांमुळे गरजू विद्यार्थ्यांना आधार मिळतोच, शिवाय त्यांच्यामध्ये आत्मविश्वास निर्माण होऊन स्वावलंबनाच्या दिशेने वाटचाल करण्यास प्रोत्साहन मिळते, असेही प्रदीपभाई बरडिया यांनी सांगितले.
या उपक्रमाच्या माध्यमातून वसतिगृहातील गरजू आदिवासी विद्यार्थीनींना कपड्यांचे वाटप करण्यात आले. वस्त्रदानाचा लाभ मिळाल्याने विद्यार्थीनींमध्ये समाधानाचे वातावरण पाहायला मिळाले. सामाजिक बांधिलकी जपत गरजू विद्यार्थिनींसाठी राबविण्यात आलेल्या या उपक्रमाचे उपस्थितांकडून कौतुक करण्यात आले.
या प्रसंगी श्री. अखिल भारतीय समरथ जैन श्रावक संघाचे ज्येष्ठ कार्यकारिणी सदस्य डॉ. रामलालजी जैन, सदस्य श्री. संजय चंपालालजी बरडिया, सदस्य श्री. शैलेश पारसमलजी जैन, महाराष्ट्र नवयुवक शाखा कार्यकारिणी सदस्य श्री. नितीन मिलापचंदजी जैन, महाराष्ट्र शाखा नवयुवक कार्यकारिणी सदस्य श्री. आकाश प्रदीपजी जैन, तसेच कमला नेहरू मुलींच्या वसतिगृहाचे अध्यक्ष महेश शिरसाठ, अधीक्षिका कावेरी कोळी यांच्यासह वसतिगृहातील कर्मचारी वर्ग आणि विद्यार्थीनी मोठ्या संख्येने उपस्थित होत्या. स्वातंत्र्यदिनाचा उत्सव सामाजिक बांधिलकी आणि मानवसेवेच्या माध्यमातून साजरा करत अखिल भारतीय समरथ जैन श्रावक संघाने गरजू विद्यार्थीनींना दिलेला हा मदतीचा हात समाजासाठी प्रेरणादायी ठरत आहे.
