टिम लोकप्रवाह, चोपडा, दि. १७ : भारतीय जनता पक्षाच्या महिला मोर्चाच्या संघटनात्मक कार्याला अधिक गती देण्यासाठी जळगाव पूर्व विभागाची आढावा बैठक रविवारी (दि. १६) चोपडा येथील लक्ष्मीनारायण लॉन्स येथे उत्साहात पार पडली. महाराष्ट्र प्रदेश महिला मोर्चाच्या प्रदेशाध्यक्ष तथा विधान परिषद आमदार चित्राताई वाघ यांच्या प्रमुख मार्गदर्शनाखाली झालेल्या या बैठकीत महिला संघटनेच्या कामाचा आढावा घेत आगामी काळातील संघटनात्मक वाटचालीबाबत दिशा निश्चित करण्यात आली.
जळगाव जिल्हा महिला मोर्चाच्या अध्यक्षा तथा नगरसेविका संध्या महाजन यांच्या अध्यक्षतेखाली झालेल्या बैठकीस प्रदेश प्रभारी सविता जैसवाल, प्रदेश सचिव रेखा वर्मा, महिला मोर्चाच्या प्रदेश महामंत्री तथा धुळे महापौर जयश्री कमलाकर अहिरराव यांची प्रमुख उपस्थिती होती.
बैठकीत जळगाव पूर्व विभागातील महिला मोर्चाच्या संघटनात्मक कामकाजाचा सविस्तर आढावा घेण्यात आला. बूथ, प्रभाग आणि स्थानिक पातळीवरील संघटनात्मक स्थिती, महिला पदाधिकाऱ्यांचा सहभाग, संघटन विस्तार तसेच आगामी कार्यक्रमांचे नियोजन यावर पदाधिकाऱ्यांमध्ये चर्चा झाली. पक्षाच्या विविध महिला-केंद्रित योजनांची माहिती तळागाळापर्यंत पोहोचविण्यासाठी प्रभावी यंत्रणा उभारण्यावरही भर देण्यात आला.
‘महिलांपर्यंत योजना पोहोचवा’
मार्गदर्शन करताना चित्राताई वाघ यांनी महिला मोर्चाचे काम केवळ पदापुरते मर्यादित न ठेवता ते तळागाळातील महिलांपर्यंत पोहोचविण्याची गरज व्यक्त केली. केंद्रातील पंतप्रधान नरेंद्र मोदी आणि राज्यातील मुख्यमंत्री देवेंद्र फडणवीस यांच्या नेतृत्वाखाली महिलांसाठी राबविण्यात येणाऱ्या विविध योजनांची माहिती अधिकाधिक महिलांपर्यंत पोहोचविण्यासाठी महिला कार्यकर्त्यांनी सक्रिय भूमिका बजावावी, असे आवाहन त्यांनी केले.
महिला मोर्चाची संघटनात्मक ताकद वाढविण्यासाठी प्रत्येक पदाधिकाऱ्याने आपल्या कार्यक्षेत्रात सातत्याने संपर्क वाढवून पक्षाच्या विचारधारेसोबत महिलांना जोडण्याचे आवाहनही त्यांनी केले.
संघटन विस्तारावर भर
जयश्री कमलाकर अहिरराव यांनी स्थानिक पातळीवरील सक्रिय सहभागातून संघटन अधिक मजबूत करण्याची आवश्यकता व्यक्त केली. रेखा वर्मा यांनी महिला मोर्चाच्या कार्याला अधिक व्यापक स्वरूप देत प्रत्येक स्तरावर प्रभावीपणे काम करण्याचे आवाहन केले.
जिल्हा महिला मोर्चाच्या अध्यक्षा संध्या महाजन यांनी महिला कार्यकर्त्यांनी एकजुटीने काम करून संघटन मजबूत करण्यासोबतच महिला सक्षमीकरणाच्या उपक्रमांना गती देण्याचे आवाहन केले.
यावेळी भाजप जिल्हा सरचिटणीस राकेश पाटील, मंडळ अध्यक्ष कांतीलाल पाटील, नरेंद्र पाटील, पिंटू भाऊ पावरा, गजेंद्रभाऊ जैसवाल, अशोक शिंपी, देवदत्त वैद्य यांच्यासह भाजपचे पदाधिकारी, महिला मोर्चाच्या पदाधिकारी आणि कार्यकर्त्या मोठ्या संख्येने उपस्थित होत्या.
महिला मोर्चाच्या आगामी संघटनात्मक कार्याची दिशा निश्चित करणारी आणि तळागाळातील संघटन अधिक सक्षम करण्यावर भर देणारी ही बैठक ठरली.
