लोकप्रवाह, चोपडा दि. ३१ जुलै – येथील पंकज प्राथमिक विद्यालयात या शैक्षणिक वर्षातील पहिली शिक्षण परिषद आयोजित करण्यात आली. निमगव्हाण व चोपडा शहर केंद्राचे केंद्रप्रमुख दिपक पाटील हे केंद्रस्तरीय शिक्षण परिषदच्या अध्यक्षस्थानी होते. तर शिक्षण परिषदेला व्यासपीठावर पंकज प्राथमिक विद्यालयाचे मुख्याध्यापक एम व्ही पाटील, सर्व शाळांचे मुख्याध्यापक, सुलभक समाधान बाविस्कर, योगेश चौधरी आदी उपस्थित होते. सर्वप्रथम ज्ञानज्योती सावित्रीबाई फुले यांच्या प्रतिमेचे पूजन करुन या वर्षातील पहील्या केंद्रस्तरीय शिक्षण परिषदेचा प्रारंभ करण्यात आला.
यावेळी पहिली ते आठवीतील सर्व विद्यार्थ्यांनी पायाभूत शिक्षण व मुलभूत क्षमता प्राप्त करणे यासाठी सर्व शाळेतील शिक्षकांनी नियोजनानुसार अध्यापन करावे, तसेच विद्याप्रवेश व सेतू अभ्यासक्रम या विविध उपक्रमांचे काटेकोरपणे अंमलबजावणी करावी असे केंद्रप्रमुख दिपक पाटील यांनी उपस्थित शिक्षकांना सूचना केल्या त्यासोबतच अनेक प्रशासकीय विषय स्पष्ट केले.
“जीवन कौशल्य स्व-ची जाणीव” या विषयावर योगेश चौधरी यांनी मार्गदर्शन केले. “चला तंत्रस्नेही होऊ या” या विषयावर समाधान बाविस्कर यांनी मार्गदर्शन केले. राष्ट्रीय निपुण भारत अभियानानुसार पायाभूत व गणितीय साक्षरता या विषयाच्या चर्चेत सर्व शाळांनी सहभाग घेतला. सदरील शिक्षण परिषद यशस्वी करण्यासाठी दिलीप बाविस्कर, रवि शार्दूल, कैलास बोरसे, प्रमोद पाटील, संदीप पाटील यांनी परिश्रम घेतले. शिक्षण परिषदेचे सूत्रसंचलन व आभारप्रदर्शन आर डी पाटील यांनी केले.
