लोकप्रवाह, चोपडा दि. ०१ आॕगस्ट – सातपुड्याच्या कुशीत वसलेल्या किल्ले विजयगड, चौगाव येथे राजा शिवछत्रपती परिवार तर्फे ३० वी गडसंवर्धन मोहीम आयोजित करण्यात आली होती. पावसाळ्याच्या निमित्ताने गड परिसरात वृक्षारोपण करण्यात आले. मागील तीन वर्षात लावलेल्या आणि आज विकसित झालेल्या वृक्षांचा अभिनव पद्धतीने वाढदिवस साजरा करण्यात आला. ‘एकच ध्यास गडकोट विकास’ हा नारा घेऊन उपस्थित मावळ्यांनी गडाच्या पायथ्याशी असलेल्या त्रिवेणी मंदिराच्या परिसरात वृक्ष लागवड करणे, त्यांना ट्री गार्ड बसवणे व परिसराची स्वच्छता करणे आदी कामे श्रमदानातून पार पाडली.
यावेळी राजा छत्रपती परिवाराचे जळगाव जिल्हा प्रमुख संतोष पाटील आणि इतर सर्व मावळे तसेच ऐतिहासिक वारसा संवर्धन कृती समितीचे अध्यक्ष पंकज शिंदे, संजय बारी व त्यांचे सहकारी तसेच वैजापूर वनक्षेत्राचे वनक्षेत्रपाल समाधान सोनवणे आणि त्यांची सर्व वनविभागाची टीम, चौगांव येथील वन व्यवस्थापन समितीचे उपाध्यक्ष विश्राम तेले, पोलीस पाटील गोरख पाटील यांच्यासह सुमारे 112 मावळ्यांची उपस्थिती होती.
