लोकप्रवाह,चोपडा दि. २६ – तालुक्यातील गलंगी येथील सावत्र आईच्या डोक्यात रात्री भर झोपेत सावत्र मुलाने लाकडी दांडका मारून खून केल्याची घटना सोमवारी (२६ रोजी) सकाळी उघडकीस आली आहे. खून झालेल्या महिलेचे नाव सहाबाई मगन उर्फ वेस्ता बारेला (वय 42) रा. गलंगी ता. चोपडा असे नाव आहे. याप्रकरणी सावत्र मुलगा आरोपी दीपक वेस्ता बारेला (वय 25) याला चोपडा ग्रामीण पोलिसांनी ताब्यात घेतलेले आहे.
याबाबत घटनास्थळी सहाय्यक पोलीस अधीक्षक कृषीकेश रावले, चोपडा शहर पोलीस स्टेशनचे पोलीस निरीक्षक अवतारसिंग चव्हाण, चोपडा ग्रामीण पोलीस स्टेशनचे पोलीस उपनिरीक्षक अमर वसावे व सहकाऱ्यांनी घटनास्थळी धाव घेतली व संशयित आरोपी सावत्र मुलास ताब्यात घेतले आहे. व त्याच्यावर चोपडा ग्रामीण पोलीस स्थानकात सी.सी.टि.एन.एस. गुरनं. १२८/२०२२ भादंवि. ३०२ प्रमाणे गुन्हा दाखल करण्यात आला आहे. सदर गुन्ह्याचा पुढील तपास पोलीस उपनिरिक्षक अमर वसावे हे करीत आहे.
तपासाधिकारी पोलीस उपनिरिक्षक अमर वसावे यांनी दिलेली माहिती अशी की, सहाबाई वेस्ता बारेला आणि तिचे पती बारेला हे गलंगी येथे शेतमालकाच्या घराशेजारी झोपडी करून राहत होते. काही महिन्यापूर्वीच नव्याने वेस्ता बारेला याच्यासोबत संसारासाठी सहाबाई बारेला या विवाह करून आलेल्या होत्या. त्यातच पहिल्या पत्नीचा मुलगा दीपक बारेला हा बाहेरगावी कामानिमित्त होता. परंतु काही कार्यक्रमानिमित्त तो गलंगी येथे त्यांच्याकडे आला होता. तो घरी आल्यामुळे सावत्र आईने तु येथे का आला? तू येथून निघून जा असे सांगितले. त्या गोष्टीचा राग आल्याने त्याने रात्री भर झोपेत असतांना सावत्र आईच्या डोक्यात दांडका मारून गंभीर जखमी केले. यातच सहाबाईचा जागेवरच मृत्यू झाला. सकाळी गलंगी येथील पोलीस पाटील देवराज यांनी चोपडा ग्रामीण पोलीस स्टेशनला फोनवरून ही घटना कळवली. त्यानंतर पोलिसांनी तिथे धाव घेतली व संशयित आरोपी सावत्र मुलाला ताब्यात घेतले.
