लोकप्रवाह, चोपडा दि. २६ – येथील महात्मा गांधी शिक्षण मंडळ संचलित एनबीए मानांकन प्राप्त श्रीमती शरदचंद्रिका सुरेश पाटील फार्मसी महाविद्यालयात “वर्षग्रंथ -2022” या वार्षिक मासिकाचे प्रकाशन कबचौ उत्तर महाराष्ट्र विद्यापीठ जळगावचे कुलगुरू डॉ. व्हि. एल. माहेश्वरी यांच्या हस्ते दिनांक 24 सप्टेंबर रोजी करण्यात आले. सदरहू कार्यक्रमाला संस्थेचे अध्यक्ष अॕड. संदीप सुरेश पाटील, सचिव डॉ. स्मिता पाटील, प्रा. डि.बी. देशमुख उपस्थित होते.
सर्वप्रथम प्राचार्य डॉ. जी. पी. वडनेरे यांनी कार्यक्रमाची प्रस्तावना केली. कुलगुरूंचे महाविद्यालयामध्ये आगमन झाले हा एक सुवर्णयोग जुळून आला आहे. आम्ही परीक्षार्थी आहोत. आपल्या येण्याने महाविद्यालयाचा व आम्हा सर्वांचा भाग्योदय झाला असे मनोगत यावेळी प्रस्तावनेत व्यक्त केले. सगळ्यांच्या चेहऱ्यावर आनंद ओसंडून वाहत होता. कुलगुरूंनी विद्यार्थांना उद्योजकीय क्षेत्रातील विविध वाटा शोधण्यासाठी प्रेरित केले. ते म्हणाले नोकरी शोधणारे होण्याऐवजी नोकरी देणारे व्हा. तसेच त्यांनी वर्षग्रंथ मध्ये समाविष्ट असलेल्या विविध विषयांवरील लेख, कविता व नाविन्यपूर्ण मुखपृष्ठ संकल्पना याचे मनस्वी कौतुक प्रकाशनावेळी केले. व पुढील वाटचालीसाठी शुभेच्छा दिल्या. कुलगुरूंनी दिलेल्या मार्गदर्शनामुळे विद्यार्थ्यांचा आत्मविश्वास व धैर्य वाढणार असे मनोगत संस्थेचे अध्यक्ष अॕड. संदीप पाटील यांनी व्यक्त केले. वर्षग्रंथच्या संपादिका डॉ. सुवर्णलता महाजन व संपादकीय विद्यार्थ्यांनी घेतलेले परिश्रम तसेच विद्यार्थ्यांनी दिलेला अभूतपूर्व प्रतिसाद या सर्वांचे तसेच वर्षग्रंथ प्रकाशनाची परंपरा जोपासल्याबद्दल अॕड.संदीप पाटील, सचिव डॉ. स्मिता पाटील यांनी अभिनंदन केले.
सदर कार्यक्रमाचे सूत्रसंचालन क्रांती पाटील यांनी तर आभारप्रदर्शन डॉ. संदीप पवार यांनी केले. कार्यक्रम यशस्वीतेसाठी अध्यक्ष अॕड. संदीप सुरेश पाटील, सचिव डॉ. स्मिता संदिप पाटील व प्राचार्य यांच्या मार्गदर्शनाखाली सर्व विभाग प्रमुख, प्रबंधक, शिक्षक, शिक्षकेतर कर्मचारी वर्गाने परिश्रम घेतले.
