लोकप्रवाह, चोपडा दि. १९ : येथील महात्मा गांधी शिक्षण मंडळ संचलित कला, शास्त्र व वाणिज्य महाविद्यालय इलेक्ट्रॉनिक्स विभागातर्फे “सायबर सिक्युरिटी: शक्यता आणि खबरदारी” या विषयावर आयोजित एक दिवसीय कार्यशाळेचे आयोजन करण्यात आले. याप्रसंगी प्रमुख अतिथी तथा मार्गदर्शक म्हणून चोपडा उपविभागाचे सहाय्यक पोलीस अधीक्षक कृषिकेश रावळे, IPS यांनी सायबर सिक्युरिटी संदर्भात उपस्थित विद्यार्थ्यांना अवगत केले. समाजमाध्यमे, ऑनलाइन बँकिंग व एकूणच सायबर जगतात घडणाऱ्या गुन्ह्यांची माहिती, व्याप्ती व कार्यपद्धती विद्यार्थ्यांना उलगडून सांगितली. प्रलोभनामुळे तरुणाई किंवा सामान्य नागरिक अनेक ऑनलाइन घोटाळ्यांना बळी पडतात, यामध्ये फोनद्वारे तोतया व्यक्तींना OTP शेअर करणे किंवा त्यांच्या अकाउंटला पैसे ट्रान्सफर करणे अशा चुकांमुळे नागरिकांची आर्थिक फसवणूक होते असेही ते यावेळी म्हणाले. सायबर गुन्ह्याचे बळी ठरल्यास तात्काळ 1930 या हेल्पलाईन वर कॉल करावा असे आवाहन त्यांनी यावेळी उपस्थितांना केले. तसेच सायबर गुन्हेगारीला रोखण्यासाठी पोलीस प्रशासनासोबत सायबर हिरो म्हणून काम केले तर समाजातील सामान्य नागरिकांना त्याचा फायदा होईल व सायबर गुन्हेगारीला आळा बसेल असे त्यांनी सांगितले.
कार्यशाळेचे उदघाटन दिपप्रज्वलनाने करण्यात आले. त्यांनतर महाविद्यालयाचे प्राचार्य डॉ. डी.ए. सूर्यवंशी यांनी प्रस्ताविकेतून महाविद्यालयाच्या विविध विद्यार्थी केंद्रित उपक्रमांची माहीती दिली तसेच आजच्या काळात सायबर साक्षरतेचे महत्व अधोरेखित केले. याप्रसंगी महाविद्यालयाचे उपप्राचार्य व इलेक्ट्रॉनिक्स विभागाचे विभाप्रमुख प्रा. डॉ. ए. एल.चौधरी यांची सुद्धा उपस्थिती होती. कार्यक्रमाचे सूत्रसंचालन इलेक्ट्रॉनिक्स विभागातील प्रा. डॉ. लालचंद पटले यांनी केले तर आभारप्रदर्शन इंग्रजी विभागप्रमुख प्रा. दिनानाथ पाटील यांनी केले.
