लोकप्रवाह, चोपडा दि. १६ – येथील महिला मंडळ माध्यमिक विद्यालयात शिक्षकेतर दिवस साजरा करण्यात येऊन शिक्षकेतर कर्मचाऱ्यांचा सन्मान करण्यात आला.
१५ नोव्हेंबर १९६७ रोजी महाराष्ट्र राज्य शिक्षकेतर संघटनेची स्थापना करण्यात आली होती. हा दिवस महाराष्ट्रात शिक्षकेतर कर्मचारी दिवस म्हणून साजरा केला जातो. शालेय कामकाजात कार्यालयीन कर्मचारी आणि सेवकांची महत्त्वाची भूमिका असून शालेय प्रशासन सुरळीतपणे पार पाडण्यासाठी त्यांचे योगदान महत्त्वाचे असल्याचे यावेळी सांगितले. या दिवसाचे औचित्य साधत महिला मंडळ माध्यमिक विद्यालयातील वरिष्ठ लिपिक भूषण धर्माधिकारी, कनिष्ठ लिपीक गोपीचंद पाटील, प्रयोगशाळा परिचर धनराज मिस्तरी, सेवक संजय पाटील, बाळासाहेब भालेराव यांचा विद्यालयातर्फे सन्मान करण्यात आला. तसेच याप्रसंगी जननायक बिरसा मुंडा यांच्या जयंती निमित्त भूषण धर्माधिकारी व गोपीचंद पाटील यांच्या हस्ते बिरसा मुंडा यांच्या प्रतिमेचे पूजन करण्यात आले.
याप्रसंगी मंचावर विद्यालयाचे मुख्याध्यापक सुनील चौधरी, ज्येष्ठ शिक्षक चंद्रकांत चौधरी हे उपस्थित होते. यावेळी विद्यालयातील शिक्षक व विद्यार्थी मोठ्या संख्येने उपस्थित होते.
