लोकप्रवाह, चोपडा दि. २२ – तालुक्यातील सहकार क्षेत्रातील सर्वात मोठा प्रकल्प हा मागील वर्षापासून बारामती अॕग्रोने भाडेतत्वावर चालविण्यास घेतला आहे. यंदा कारखान्याचा गळीत हंगाम सुरु होवून तब्बल वीस दिवर लोटले मात्र अद्यापही ऊसाचा दर निश्चित न केल्यामुळे तालुक्यातील ऊस उत्पादक शेतकरी संभ्रमात आहे. त्यामुळे बारामती अॕग्रो युनिट ४ ने एफआरपी प्रमाणे पहिली उचल २५०० रुपये द्यावी अन्यथा शेतकरी संघटना दि.२४ ला कारखाना साईटवरील वजनकाट्यावर ठिया आंदोलन करणार असल्याचे निवेदन तहसीलदार यांना आज रोजी देण्यात आले.
एकीकडे संपूर्ण महाराष्ट्रातील साखर कारखान्यांनी ऊसाचा दर निश्चित केलेला आहे. पश्चिम महाराष्ट्रात ऊसाला ३५०० रुपये व गुजरातमध्ये ऊसाला ४५०० रुपये दर मिळत असताना खान्देशातील ऊसाला मात्र अल्पदर देण्यात येतो हि मात्र शोकांतिकाच म्हणावी लागेल. बारामती अॕग्रो युनिट ४ ने गेल्या हंगामात उसाला २०३१ रुपये दर दिला होता तर मुक्ताई शुगरने १८०० रुपये दर दिला होता. मात्र यंदा कारखाना सुरु होवून वीस दिवस लोटून गेले तरीसुद्धा बारामती अॕग्रोने अद्यापही ऊसाचा दर जाहीर केलेला नाही. त्यामुळे ऊसाला एफआरपीप्रमाणे पहिली उचल २५०० रुपये मिळावी अन्यथा शेतकरी संघटनेमार्फत २४ तारखेला गुरूवारी कारखाना साईटवरील वजन काट्यावर ठिय्या आंदोलन करण्यात येईल. अशा आशयाचे निवेदन नायब तहसीलदार सचिन बांबळे यांना देण्यात आले. या आंदोलनात तालुक्यातील ऊस उत्पादक शेतकरी बांधवांनी आपली उपस्थिती द्यावी असे आवाहन शेतकरी संघटनेतर्फे करण्यात आले आहे.
सदर निवेदन देतेवेळी शेतकरी संघटनेचे उत्तर महाराष्ट्र विभागीय अध्यक्ष संदीप पाटील, उप जिल्हाध्यक्ष किरण गुजर, चोपडा तालुकाध्यक्ष सचिन शिंपी, विनोद धनगर आदिंसह इतर पदाधिकारी उपस्थित होते.
