लोकप्रवाह, चोपडा दि. ०६ डिसें. (संदिप ओली) – रावेर येथे संपन्न झालेल्या विभागस्तरीय शालेय शासकीय वेटलिफ्टिंग क्रीडा स्पर्धेमध्ये चोपडा येथील प्रताप विद्यामंदिरातील इ. ११ वी चे गणेश दीपक महाजन व प्रज्ञा विनायक महाजन या दोन खेळाडूंनी सहभाग नोंदविला होता. यामध्ये मुलांमध्ये गणेश दिपक महाजन याने प्रथम तर मुलींमध्ये प्रज्ञा विनायक महाजन द्वितीय क्रमांक प्राप्त केला. त्यामुळे प्रथम क्रमांक प्राप्त केलेला गणेश महाजन हा आता राज्यस्तरावर होणाऱ्या वेटलिफ्टींग स्पर्धेत नाशिक विभागाचे प्रतिनिधीत्व करणार ही चोपडेकरांसाठी अभिमानाची बाब आहे! विद्यार्थ्यांच्या या यशाबद्दल त्यांच्यावर सर्वदुर अभिनंदनाचा वर्षाव होत आहे.
राज्यस्तरावर स्पर्धेत विभागाचे प्रतिनिधीत्व करण्याचा बहुमान प्रथमच चोपडा तालुक्याला प्रताप विद्या मंदिरातील विद्यार्थ्यांनी मिळवून दिला आहे. दोघेही खेळाडूंना प्रताप विद्या मंदिराचे क्रीडा विभाग प्रमुख एस.एस.पाटील व क्रीडाशिक्षक नरेंद्र एन.महाजन यांचे मार्गदर्शन लाभले.
त्यांच्या या निवडीबद्दल संस्थेचे चेअरमन राजाभाई मयूर, अध्यक्षा शैलाबेन मयूर, उपाध्यक्ष विश्वनाथ अग्रवाल, संस्थेच्या सचिव माधुरीताई मयूर, सदस्य चंद्रहासभाई गुजराथी, भूपेंद्रभाई गुजराथी, संस्थेचे समन्वयक गोविंद गुजराथी तसेच विद्यालयाचे मुख्याध्यापक प्रशांत गुजराथी, उपमुख्याध्यापक एस.जी.डोंगरे, उच्चमाध्यमिक विभागाचे उपप्राचार्य जे.एस.शेलार, पर्यवेक्षिका माधुरी पाटील, पर्यवेक्षक पी.डी.पाटील यांच्यासह सर्व शिक्षक व शिक्षकेतर कर्मचारी तसेच विद्यार्थी यांनी भरभरून कौतुक केले.
